С.Батзориг зургадугаар ангиасаа л Монголын хүүхдийн ордны драмын дугуйланд суралцаж, төгсөөд СУИС-д элссжээ. Тэрбээр СУИС-ийг 2011 онд Ардын жүжигчин Ж.Лхамхүүгийн удирдлагад төгссөн байна.
Тэрбээр хүүхэд ахуйдаа “Өлгийтэй инээд” хүүхдийн хошин шоу тоглолтоос уран бүтээлийн гараагаа эхэлж, улмаар СУИС төгсөөд ажлын гараагаа “Х ТҮЦ” продакшнд тайз зөөхөөс эхэлжээ. Одоо ч тус продакшнаараа овоглож яваа тэрбээр өнгөрсөн хугацаанд “Х ТҮЦ” продакшны шоу тоглолтууд, “Боловсрол” телевизийн бэлтгэн хүргэдэг “Бурхны авралаар чи ирлээ” шоу нэвтрүүлэг, “Орфей” театрын уран бүтээл Сорогдогийн Жаргалсайханы “Шөнө дундын бүжиг” жүжигт тоглосноос гадна “Итгэл”, “Академи ажиллагаа”, “Зуун жилийн эморол”, “Энгийн иргэн”, “Өндгөн толгойт”, “Төлөөс”, “Хэрмэл жүжигчид”, “Баавгай болох сон” зэрэг бүрэн хэмжээний уран сайхны киноны гол болон туслах дүрд тогложээ.
Сүүлийн жилүүдэд С.Батзориг дэлгэцийн уран бүтээлүүд бие даан бүтээж, үзэгчдэд хүргэж буй. 2021 онд жүжигчин Н.Баясаа, Г.Лхагвацэрэн, У.Цогтбаяр, Р.Сүхболд нартай хамтран “In da house”, 2022 онд “In da house: Come back” адал явдалт, инээдмийн уран сайхны киног үзэгчдэд хүргэж байв. Харин энэ удаа “In da house-3: in Korea” киног БНСУ-ын уран бүтээлчидтэй хамтран бүтээснээ гуравдугаар сарын 6-наас үзэгчдэд хүргэх гэж байна.
