Энэтхэгийн Соёлын харилцааны зөвлөлөөс 10 дахь удаагаа зохион байгуулсан олон улсын хөгжим бүжгийн наадам энэ оны хоёрдугаар сарын 20-27-ны өдрүүдэд БНЭУ-ын есөн хотод болж өндөрлөлөө. Эл наадамд Монгол Улс, ОХУ, Бүгд Найрамдах Киргиз Улс, Өмнөд Африкийн Бүгд Найрамдах Улс, Руандагийн Бүгд Найрамдах Улс, Малайз, Мальдивын Бүгд Найрамдах Улс, Бүгд Найрамдах Бангладеш Ард Улс, Бүгд Найрамдах Энэтхэг, Бүгд Найрамдах Социалист Вьетнам Улс, Бүгд Найрамдах Фижи улс зэрэг нийт 11 улсын 100 гаруй уран бүтээлч оролцсон байна.
Манай улсаас Гавьяат Жүжигчин Д.Ичинхорлоогийн нэрэмжит Архангай аймгийн Хөгжимт драмын театрын бүжгийн багш П.Энхтуяагаар ахлуулсан Үндэсний бүжгийн “Хангай ханы эгшиглэн” хамтлаг оролцсон аж. Мөн бүрэлдэхүүнд Өвөрхангай аймгийн Оргийн нэрэмжит Хөгжимт драмын театрын гоцлол бүжигчин Д.Хишигтогтох, бүжигчин Ж.Сандагдорж, Баянхонгор аймгийн Лувсанвандангийн нэрэмжит Хөгжимт драмын театрын гоцлол бүжигчин Т.Энхтуяа, гоцлол бүжигчин В.Батбямба, Хөвсгөл аймгийн Хөгжимт драмын театрын бүжигчин П.Баттуул, Н.Лхагвабаяр нар багтжээ.
