“Habibi”, “Yag enchee”, “Gund” зэрэг уран бүтээлээрээ орчин үеийн хөгжим сонирхогчдод хэдийн танигдсан дуучин, жүжигчин AM-C буюу Г.Энх-Амар энэ хаврыг “Халуун бороо” кинотойгоор угтаж байна. Тодруулбал, “Милл” кино компани Монголын гал сөнөөгчдийн эр зориг, хүнлэг сэтгэлийн бодит түүхээс сэдэвлэсэн “Халуун бороо” уран сайхны киног бүтээжээ. Эл киноны гол дүрд Г.Энх-Амар Г.Эрхэмбаяр, Ч.Болд, Х.Цасчихэр, нарын жүжигчидтэй хамтран тогложээ.
Г.Энх-Амар нь уран бүтээлийн гараагаа “25 дугаар суваг” телевизийн “Making the band” реалити нэвтрүүлэгт оролцож, “Mixx” хамтлагт элссэнээр эхэлсэн юм. Тэрбээр 2016 онд дебют сингл “Habibi” дуугаа уран бүтээлч Siente-тэй хамтран гаргаж, 2018 онд дебют цомог “Jene Sequa” цомгоо долоон дуутайгаар гаргасан юм. Түүнээс хойш 2019 онд “Gund”, 2022 онд “Perfect blue” бие даасан цомгуудыг сонсогчдодоо хүргэсэн.
Дэлгэцийн уран бүтээлийн тухайд Г.Энх-Амар СУИС-ийг төгссөнөөсөө хойш “Монгол” телевизийн “Гацуурхан-2”, “Black zebra” студийн “Залхуус”, “Xermel team”-ийн “In da house: Comeback” зэрэг кинонд тогложээ.
