УДБЭТ-ын уран бүтээлчид Төрийн хошой шагналт, хөгжмийн зохиолч Л.Мөрдоржийн “Хөхөө намжил” дуурийг толилуулахаар болжээ. Тоглолт дөрөвдүгээр сарын 12-ны 17:00, 13-ны 15:00 цагаас болох юм байна. Тус дуурийн гол дүр Хөхөө Намжилын дүрийг дуучин Б.Батжаргал бүтээнэ.
“Хөхөө Намжил” дуурийг морин хуур хөгжим анх үүссэн ардын домгоос үндэслэн бүтээсэн бөгөөд ард түмний авьяас билэг ширгэшгүй ундрага, аман зохиол ялангуяа үлгэр, туульс, ерөөл, магтаал хичнээн баялаг болохыг магтан дуулсан юм.
Дуурийн үйл явдал ноёнтойгоо үзэл бодол таараагүй учир залуу Намжилыг алс Алтай нутагт хугацаагүй цэргийн албанд явуулж буйгаар эхэлнэ. Эх нутгаа санасан Намжил уянгалаг хоолойгоороо гайхагдаж “Хөхөө Намжил” алдарыг хүртжээ. Түүний дуулахыг Алтайн дагина сонсон Алтай нутгийг магтан дуулахыг хүснэ. Эх нутгийг нь магтан дуулсан Хөхөө Намжилд Алтайн дагина талархаж алт эрдэнэс барьсан ч төрсөн эх нутаг, амраг хүүхэн Уянгаа мөрөөдөж уулзахыг хүсэн байгаагаа хэлнэ. Алтай дагина түүнд гуурст хурдан хүлэг бэлэглэхэд Хөхөө Намжил тэр хүлгээ хөлөглөн эх нутаг амраг хүүхэнтэйгээ хоромын төдийд очин уулзах болов. Хорон санаатны ятгалгаар Уянга хүүхэн гуурст хүлгийн нь гуурсыг хайчлан хорооно. Алтайн дагина Уянга хүүхэнд гуурст хүлгийн нь дурсгалыг нь хүндэлж сүүлний хялгасаар нь чавхдас хийж морин толгойт хөгжим хийж Намжилдаа өгвөл түүний сэтгэлийн татах болно гэж зөвлөж буйгаар дуурийн үйл явдал өрнөдөг.
“Хөхөө намжил” дуурийг анх 1961 онд тайзнаа анх тоглосон бөгөөд тус дуурь нийт гурван удаа шинэчлэгдсэн байна. Хамгийн сүүлд 2019 онд Урлагийн гавьяат зүтгэлтэн Л.Эрдэнэбулган дахин шинэчилэн найруулжээ.
