“Моушн Монголиа” олон улсын орчин үеийн бүжгийн дөрөв дэх удаагийн наадам энэ сарын 14-20-нд болно. Энэ удаагийн наадмын зорилго нь мэргэжлийн урлагийн байгууллагын урын санг орчин үеийн бүжгийн төрлөөр баяжуулах, уран бүтээлчдийн хамтын ажиллагааг өргөжүүлэх, олон нийтийн урлагийн боловсролыг дээшлүүлэхэд чиглэж байгаа юм.
Наадмын хүрээнд И.Ф.Стравинскийн “Ариун хавар” балетыг бүжиг дэглээч Б.Одбаяр “Улаанбаатар” театрын бүжигчидтэй хамтран орчин үеийн тавилтаар дэглэж, “Хангарди” үндэсний хөгжмийн найрал, удирдаач Б.Эрхэмбаяр удирдана. Мөн ХБНГУ-ын бүжиг дэглээч Фабиан Коннын “Тойрог зам” орчин үеийн бүжгийг УДБЭТ-ын балетын жүжигчидтэй хамтран дэглэх юм. Энэхүү бүтээлүүд нь монголын орчин үеийн бүжгийн урын санг баяжуулж буйгаараа онцлогтой.
Наадмын хөтөлбөрт мэргэжлийн бүжигчдэд зориулсан сургалт, мастер класс багтсан бол наадмын нэгдсэн “Тойрог” орчин үеийн бүжгийн тоглолтыг УДБЭТ-ын тайзнаа олон нийтэд энэ сарын 19, 20-нд толилуулах юм.
Энэхүү бүжгийн наадам нь дэлхийн шилдэг орчин үеийн бүжгийг Монголын үзэгчдэд хүргэх, бүжгийн салбарын олон улсын хамтын ажиллагааг нэмэгдүүлэх зорилгоор 2018 онд анх удаа зохион байгуулж, АНУ, Канад, ОХУ болон Монголын орчин үеийн бүжгийг толилуулж байв. Мөн 2021 онд “Хотын хэмнэл” сэдвийн дор мэргэжлийн бүжигчид болон бүжиг сонирхогчдын дунд уралдаан зарлаж, шилдгүүдийг шалгаруулах замаар орчин үеийн бүжгийг олон нийтэд таниулан сурталчлах зорилгоор зохион байгуулсан юм. Тэгвэл 2024 онд бүжиг дэглээчдийн чадавхыг дээшлүүлэх зорилгоор Австрали, Унгар, Герман, БНСУ-ын мэргэжлийн бүжиг дэглээчдийг урьж, сургалт, нүүдлийн урлан солилцооны хөтөлбөрийг зохион байгуулж, нэгдсэн тайлан тоглолтыг олон нийтэд нээлттэй толилуулжээ.
