Монголын хөгжмийн урлагийн хөгжилд хувь нэмрээ оруулан, монгол үндэсний чавхдаст хуучир хөгжмийн тансаг аялгууг өөрийн авьяас билгээрээ түгээж яваа хуучирч Э.Цэндсүрэн өнгөрсөн онд “Romances and Concerto for Khuuchir and Orchestra by Sharav Byambasuren” нэртэй цомгоо гаргасан. “Aydu records”-оос эрхлэн гаргасан энэхүү цомог нь Төрийн шагналт, Урлагийн гавьяат зүтгэлтэн, хөгжмийн зохиолч Б.Шаравын долоон романс, нэг ари, нэг дуун романс, нэг концертоос бүрдсэн юм.
Тэгвэл виртуоз хуучирч Э.Цэндсүрэн бие даасан уран бүтээлийн тоглолтоо “Continuum” буюу “Үл тасрах” хэмээн нэрлэн, ирэх тавдугаар сарын 3-нд Улсын филармонид хийхээр болжээ. Тоглолтод Монгол ардын хөгжмийн зэмсэг болох хуучирт зориулсан Монгол, гадаадын шилдэг бүтээлүүдийг төгөлдөр хуур болон Монгол Улсын Морин хуур их найрал хөгжмийн хамтаар эгшиглүүлэх аж.
Тоглолтын хөтөлбөр
Нэгдүгээр хэсэг:
- Н.Жанцанноров- Хуучирт зориулсан соната – I, II, III анги
- Ли Юан Чин- “Тао Хуа Ву” гудамж
- Х.Алтангэрэл- “Бодол”
- П.Сарасатэ- Интродукция ба тарантелла, Op.43
Хоёрдугаар хэсэг:
- Х.Алтангэрэл – Хуучир, найрал хөгжимд зориулсан концерт
- Б.Шарав- “Бүүжидмаа”
- Ван Жиамин- Хуучирт зориулсан рапсоди No.6
Ташрамд танилцуулахад хөгжмийн гэр бүлд төрж өссөн Э.Цэндсүрэн 12 настайгаасаа хөгжмийн сургуульд суралцаж, улмаар Монгол Улсын Консерваторт бакалавр, БНХАУ-ын Шанхайн Консерваторт магистрийн зэрэг хамгаалжээ. Тэрбээр олон уралдаан, наадмаас шагнал хүртэж байснаас хамгийн сүүлд 2023 онд Б.Шаравын нэрэмжит “Үндэсний хөгжимчид, дуулаачдын III уралдаан”-ны тэргүүн байрыг эзэлж, “Дотоод хөрөг”, “Romantic strings, “Тал нутгийн магтуу” зэрэг бие даасан болон хамтарсан тоглолтоо толилуулж байв.
