Бодибилдинг, фитнесийн Дэлхийн аварга шалгаруулах тэмцээний хошой аварга Н.Ануужин “Anuxai’s fitness” реалити шоу төслийнхөө гурав дахь улирлын дугааруудыг өнгөрсөн даваа гараг /2025.04.14/-аас үзэгчдэд хүргэж эхэлсэн. 45 хоногийн хугацаанд бүсгүйчүүдийг галбиржуулах эрчимтэй хөтөлбөр хэрэгжүүлдэг эл нэвтрүүлэгт энэ удаа зургаан бүсгүй оролцож байгаагаас үзэгчдийн анхаарлыг хамгийн их татаж буй нь Д.Дөлгөөн.
Цахим орчинд Хоронзон гишүүн гэх дүрийг бидний хэзээний танил мэт болтол хоногшуулж буй залуу жүжигчин Д.Дөлгөөн Улаанбаатар хотод төрж, Баянхонгор аймагт өсжээ. Хоёрдугаар ангийн сурагч байхдаа “Уран жиргээ” уран уншлагын улсын уралдаанд түрүүлж, түүнээс хойш урлагтай холбогдон, театрт л өнждөг хүүхэд байжээ. Тэрбээр СУИС-ийг 2022 онд найруулагч мэргэжлээр төгссөн бөгөөд Урлагийн гавьяат зүтгэлтэн, найруулагч Ч.Найдандоржийн шавь. Сургуулиа төгссөнөөс хойш МҮОНРТ-ийн “Өглөөний хөтөлбөр”-т ассистент найруулагч, Монголын радиод нэвтрүүлэгч, NTV телевизэд эвлүүлэгч зэрэг ажлууд хийж байжээ. Харин өөрөө жүжиглэх дуртай учир видео контент хийхээр шийдээд мэргэжил нэгт үеийн залуустайгаа хамтран контент хийж эхэлсэн нь түүнийг олон нийтэд таниулаад буй юм.
