Оюутан ахуйгаасаа “Маск” продакшнаас ажлын гараагаа эхэлсэн Х.Цасчихэрийг үзэгчид “Босго тотго” олон ангит кино, “Соёлын довтолгоо”, “In da house”, “Ghost”, “Гэрэл”, “Алдарт ээжүүдийн ажил хаялт”, “Ээж”, “Чи өөрөө хайр”, “Тойрог” “Андгай” зэрэг уран сайхны кино, түүнчлэн “Орфей” театрын бүтээл, Ф.М.Достоевскийн “Гэм зэм” пост драмын жүжигт тоглосноор нь эчнээ мэднэ. Ардын жүжигчин, найруулагч Б.Мөнхдоржийн шавь тэрбээр өдгөө “Reaction” продакшн байгуулан, тайз, дэлгэцийн уран бүтээлүүдийг үзэгчдэд хүргэж буй. Өнгөрсөн хугацаанд Х.Цасчихэр тус продакшныхаа “Даариймаа”, “Reaction comedy”, “Хоолайнуу”, “Андээээ” зэрэг контентуудыг найруулан үзэгчдэд хүргэснээс гадна “Ghost” бүрэн хэмжээний уран сайхны кино, “Чи надад хайртай” мюзикл инээдмийн жүжгийг олны хүртээл болгосон. Мөн өнгөрсөн арванхоёрдугаар сард “Хайрын бэлэг” уран сайхны киног найруулж, үзэгчдэд хүргэсэн юм.
Тэгвэл Х.Цасчихэр яг одоо “Халуун бороо” уран сайхны киногоор үзэгчидтэй “уулзаж” байна. Монголын гал сөнөөгчдийн эр зориг, хүнлэг сэтгэлийн бодит түүхээс сэдэвлэн “Милл” кино компанийн бүтээсэн эл кинонд тэрбээр гол дүрүүдийн нэг болох Билгүүн хэмээх дүрийг бүтээжээ.
