Инээдмийн урлагийн загалмайлсан эцэг хэмээн олноо хүндлэгддэг Б.Батзаяад зориулсан хандивын тоглолт ирэх сарын 3-нд “UB palace”-д болно. Тоглолтод Монголын орчин цагийн хошин урлагийг үндэслэгчид, хошин шогийн продакшнууд оролцох ажээ. Тоглолтын талаар жүжигчин Б.Батзаяатай цөөн хором ярилцлаа.
-Өвчин хэлж ирдэггүй хийсч ирдэг. Өвчний шинж тэмдэг хэзээ илэрсэн бэ?
-Би Солонгос улсад зүрхний титэм судасны үрэвслийн улмаас ха галгаа хийлгэхээр болсон юм. Урьд нь миний зүрхний хэм алдагддаг байсан. Ер нь жүжигчин хүн гэдэг үргэлж сэтгэлийн хөдөлгөөнтэй, өөрөөсөө асар их энергийг гаргаж байдаг учраас зүрхний өвчлөлд өртөх нь элбэг байдаг. Нэг талаасаа энэ маань мэргэжлийн шинж чанартай өвчин юм даа.
-Хагалгааны өртөг өндөр үү?
-III эмнэлэгт хийлгэсэн шинжилгээнийхээ хариуг Солонгос, Тайланд улс руу явуулсан юм. Тэгээд Солонгосын эмнэлгийг сонгосон. Ирэх сарын эхээр Солонгос руу явна. Эмчилгээний өртөг нь 40000- 50000 ам.доллар болох байх.
-Хандивын тоглолт хийх саналыг хэн гаргасан бэ?
-Манай хошин урлагийнхан маань намайг өвчтэй байсныг мэдэж байсан. Тэгээд л “Та эмчилгээ хийлгэх хэрэгтэй. Бид хандивын үйл ажиллагаа зохиоё” гэж байсан ч би нэрэлхээд үгүй л гэдэг байлаа. Саяхан би эмнэлэгт хэвтээд шинийн зургаанд гарсан. Тэгээд манай жүжигчид ярилцаад хандивын тоглолт хийе, танд сэтгэлийн дэм хайрлая гээд энэ тоглолтыг зохион байгуулахаар болсон.
Эх сурвалж http://www.info.mn
