Монгол Улсад энэ өдрүүдэд Австри Улсын Ерөнхийлөгч Александр Ван дер Беллен айлчилж буй. Айлчлалын үеэр Төрийн ордонд даваа гараг (2025.05.26)-т “Чингис хаан” үндэсний музей, Австри улсын Шинжлэх ухаан академийн Иран судлалын хүрээлэн хоорондын харилцан ойлголцлын санамж бичиг байгуулав.
Санамж бичгийг Монголын талаас “Чингис хаан” үндэсний музейн захирал, Академич С.Чулуун, Австрийн талаас ШУА-ийн Ерөнхийлөгч Хайнз Фассманн нар гарын үсэг зурлаа.
Тус хүрээлэнгийн захирал Монголын эзэнт улсын түүх, Ил хаант улсын түүх судлаач, эрдэмтэн Ph.D Бруно Де Никола тус музейтэй Монголын эзэнт гүрний түүхийг судлах, судлаач солилцох, хамтарсан төсөл хөтөлбөр хэрэгжүүлэхээр тохиролцов.
Уг санамж бичгийг үзэглэснээр талууд эрдэм шинжилгээ, судалгааны чиглэлээр хамтран ажиллаж, түүхэн баримт, материал, цуглуулгатай харилцан танилцаж, шинжлэх ухааны чиглэлээр хамтран ажиллана.
