Монгол-Францын уран бүтээлч Céline Dessberg-ийн “Сэлэнгэ” дуу “Gucci” брэндийн “Cruise 2026” загварын шоуны тайзнаа эгшиглэлээ.
Тавдугаар сарын 15-нд Италийн Флоренц хотод “Gucci” брэндийн “Cruise 2026” загварын шоу түүхэн “Palazzo Settimanni” ордонд боллоо. Энэхүү ордон нь “Gucci”-ийн архив байрладаг түүхэн газар юм. Шоуны үеэр “Gucci”-ийн өнгөрсөн үеийн 46,000 гаруй загвар бүхий архивын цуглуулгыг толилуулсан бөгөөд брэндийн түүхэн өвийг орчин үеийн загварын шийдлүүдтэй хослуулжээ.
“Сэлэнгэ” аялгуут бүтээл нь загварын үзүүлбэрийн кино мэт уур амьсгалыг бий болгож, “Gucci”-ийн түүхэн болон орчин үеийн загварын нэгдлийг улам тодотгож өгсөн байна. Тус уран бүтээл нь Монголын байгаль, уламжлал, орчин үеийн уран сэтгэмжийг хослуулсан бүтээл бөгөөд “Gucci”-ийн архивын гүн утга, тансаг хэв маягтай гайхалтай зохицож байв.
Céline Dessberg бол Монгол-Франц гаралтай дуучин, хөгжмийн зохиолч юм. Түүний хөгжмийн бүтээлүүд нь Монголын соёл, уламжлалыг Францын орчин үеийн амьдралын хэв маягтай хослуулсан байдаг. Тэрбээр ятга, гитар, төгөлдөр хуур зэрэг зэмсгүүдийг ашиглан, инди поп, софт рок, жазз, электро зэрэг жанрыг нэгтгэсэн өвөрмөц өнгө төрхийг бий болгожээ. Түүний дууны үгс нь франц, англи, монгол хэлээр бичигдсэн байдаг юм.
“Gucci”-ийн түүхэн шоунд монгол аялгуу эгшиглэсэн нь олон улсын тавцанд Монгол уран бүтээлчдийн дуу хоолой улам хүчтэй болж байгааг харуулсан чухал мөч боллоо.
