Монгол Улсад үндэсний мөнгөн тэмдэгт “төгрөг”-ийг гүйлгээнд гаргасны 100 жилийн ойг тохиолдуулан Монголбанкаас “Нэг төгрөг” нэг унцын алт, мөнгөн дурсгалын зоосыг худалдаанд гаргалаа.
Одоогоос 100 жилийн тэртээ буюу 1925 оны арванхоёрдугаар сарын 9-ний өдөр 900 сорьцтой цагаан мөнгө, 18 грамм жинтэй “Нэг төгрөг”-ийн зоосон болон долоон төрлийн цаасан мөнгөн тэмдэгт гүйлгээнд гаргасан түүхтэй. Энэ ойг тохиолдуулан “Нэг төгрөг” дурсгалын зоосыг хэт өндөр (smartminting ultra high relief) технологиор, нэг унц буюу 31.1 гр жинтэй, 33 мм диаметртай, 999.9 сорьцтой цагаан мөнгө, алтаар цутгаж худалдаанд гаргалаа.
Мөн хүүхэд залууст мөнгөн тэмдэгтийн тухай мэдлэг мэдээлэл олгохоор төв банканд шинэ танхим нээж, мөнгөн тэмдэгтийн тоног төхөөрөмж, хэв, зоос, мөнгөний нууцлал, алтны жин, 1925 оны “Үнэн” сонин зэрэг эд зүйлсийг байрлуулсан аж.
Аливаа үндэстний мөнгөн тэмдэгт нь тухайн улсын ёс заншил, бахархал, хөгжлийг өгүүлсэн байдаг бөгөөд санхүү, төлбөрийн хэрэгслийн түүхэнд чухал ач холбогдолтойг Монголбанк тодотгожээ.
