Тулгар төрийн 2234, Их Монгол Улсын 819, Үндэсний тусгаар тогтнолоо сэргээн мандуулсны 114, Ардын хувьсгалын 104, Ардчилсан хувьсгалын 35 жилийн ой болон Үндэсний их баяр наадмын хүрээнд зохион байгуулж буй “Монгол бахархал – Мөнхөд гэрэлтэх Монгол” гэрэл зургийн үзэсгэлэн Монголын Уран зургийн галерейд нээлтээ хийлээ.
Энэхүү үзэсгэлэнг Соёл, спорт, аялал жуулчлал, залуучуудын яам, Засгийн газрын хэрэгжүүлэгч агентлаг Соёл урлагийн газар, Монголын гэрэл зурагчдын нэгдсэн холбоо хамтран зургаа дахь жилдээ зохион байгуулж байгаа бөгөөд монгол түмний төрт ёс, түүх, байгаль, соёлын өвийг гэрэл зургаар дамжуулан олон нийтэд таниулж, бахархал төрүүлэх зорилготой юм.
Нээлтийн ажиллагаанд Соёл, спорт, аялал жуулчлал, залуучуудын яамны Төрийн нарийн бичгийн дарга С.Оюунбилэг, Монголын гэрэл зурагчдын холбооны нарийн бичгийн дарга Ц.Батбаатар нар оролцож үг хэлсэн бол хүндэт зочид төлөөлөгчид хүрэлцэн ирж үзэсгэлэнг үзэж сонирхлоо.
Энэ удаагийн үзэсгэлэнд төрийн тахилгат “Арван гурван” их хайрхан, түүний дотор “Бурхан Халдун” зэрэг түүх, байгаль, шинжлэх ухааны үнэ цэнэ бүхий сэдвүүдийг хөндсөн гэрэл зургууд багтсан байна.
Мөн Япон Улсын Эзэн хаан Нарухито, хатан Масако нарын Монгол Улсад хийж буй төрийн айлчлалтай холбогдуулан хоёр орны найрамдалт харилцааг харуулсан гэрэл зургууд тус үзэсгэлэнгийн онцлох хэсэг болжээ.
Үзэсгэлэнгийн бас нэг онцлох хэсэг бол “Токио хот Монголын гэрэл зурагчдын дуранд” нэртэй цомог бөгөөд “Токиогийн гэрэл зургийн сар–2025” арга хэмжээнд оролцсон монгол гэрэл зурагчдын бүтээлүүдийг багтаасан бөгөөд Японы байгаль, уламжлал, ахуй соёлыг монгол гэрэл зурагчдын өнцгөөс харуулсан бүтээлүүдийг дэлгэжээ.
Үзэсгэлэн 2025 оны 7-р сарын 8-наас 20-ныг хүртэл Монголын Уран зургийн галерейд үргэлжилнэ.
