ОХУ-ын Волга мөрний хөвөөнөө Оросын дуурийн алдарт тенор, Ардын жүжигчин Сергей Яковлевич Лемешевийн олон улсын дуурийн залуу дуулаачдын IV уралдаан болж өндөрлөлөө.
Ленинградын Бага театрын “Травиата” (1951), Оросын Большой театрын “Вертер” (1957) дууриудын найруулагч С.Лемещевийн мэндэлсэн эртний Тверь хотноо болсон уралдааныг ОХУ-ын Соёлын яамны ивээл дор Тверь мужийн Засгийн газар, Соёлын яамнаас дөрөв дэх жилдээ зохион байгууллаа.
Тверийн Улсын эрдмийн филармонид болсон уг уралдааны гала тоглолтод ОХУ-ын Гнесиныхны нэрэмжит Хөгжмийн академийн сонгодог дуурийн урлагийн магистрантурын төгсөгч, дуурийн дуучин, баритон Б.Доржнамжин С.Лемещевийн олон улсын дуурийн дуулаачдын IV уралдааны финалист бөгөөд дипломант, Казахстан улсын Астанагийн ДБЭТ-д гоцлон дуулж буй манай шилдэг баритонуудын нэг болох Х.Мөнхтүвшин нар оролцож, гутгаар байрын шагнал хүртжээ.
Энэхүү уралдаанд ОХУ, БНХАУ, Монгол Улс, Казахстан, Беларусь, Армени, Узбекистан, Абхаз улсуудаас шалгарсан дуучид нийт гурван шатанд Оросын бөгөөд дэлхийн хөгжмийн сонгодог бүтээлүүдээс дуулж хасагдах зарчмаар өрсөлдсөн бол олон улсын шүүгчдээр “Accademia Granforte” уран сайхны удирдаач, профессор Агакулиев Эльхан (Герман), Сербийн нэрт баритон, Белградын дуурь, бүжгийн “Мадленианум” театрын захирал, профессор Никола Мияилович (Серби)” Швейцарын “Тайзны урлагийн удирдлага”-ын ерөнхий захирал, Сонгодог урлагийн Аспендос наадмын захирал бөгөөд зөвлөх, Венецийн “Dimensione Lirica” удирдах зөвлөлийн гишүүн Виктор Бокман (Швейцар) нар ажиллассан байна.
Б.Доржнамжин, Х.Мөнхтүвшин нарын хувьд өнгөрсөн дөрвөн жилийн хугацаанд олон орны дуурийн дуулаачдын чансааг сорьсон олон улсын уралдаануудад өөрийн эх орноо нэр төртэй төлөөлөн оролцож, дуулах ур чадвараа гайхуулан таниулж буй, яах аргагуй манай туршлагатай мэргэжлийн дуучид юм.
