Хүннүгийн язгууртны оршуулгын цогцолбор дурсгалыг Дэлхийн соёлын өвд бүртгүүлэх ажлын хүрээнд ЮНЕСКО-гийн Хөшөө дурсгал, дурсгалт газрын олон улсын зөвлөлийн шинжээч, мэргэжилтнүүд манай улсад ажиллаж байна.
Археологичид Монголын нутаг дэвсгэрээс Хүннүгийн язгууртны орд өргөөний ул мөр, оршуулгын цогцолбор, булш бунхан, хадны зураг бүхий 60 гаруй дурсгалт газрыг илрүүлэн судалсан байдаг. Тэдгээрээс Архангай аймгийн Хайрхан, Эрдэнэмандал сумын нутаг Хүнүй голын хөндийд 400 гаруй га газрыг хамран орших Хүннүгийн язгууртны оршуулгын цогцолборт газрыг Дэлхийн соёлын өвд бүртгүүлэх хүсэлтийг манай улс өнгөрсөн оны намар албан ёсоор гаргасан юм. Үүний дагуу ЮНЕСКО-гийн Хөшөө дурсгал, дурсгалт газрын олон улсын зөвлөлөөс манай улсад шинжээч томилжээ.
Соёлын өвийн дурсгалуудыг олон улсын мэргэжилтнүүдэд танилцуулж, шаардлагатай баримт, нотолгоо, шинжилгээг баталгаажуулах ажлын хэсэгт ССАЖЗЯ, ШУА, Байгаль, соёлын өвийг хамгаалах сангийн төлөөллөөс гадна орон нутгийн удирдлага, соёлын өвийн ажилтан, байгаль хамгаалагч багтсан аж.
Шинжээчид өчигдөр Гол модны болон Дуурлиг нарсны дурсгалт газартай танилцжээ. Хүннүгийн үеийн язгууртнуудад холбогдох цогцолбор дурсгалыг Дэлхийн соёлын өвд бүртгүүлснээр тэдгээрийг илүү өндөр түвшинд судлах, гаднын нөлөөллөөс хамгаалах, мэргэжлийн байгууллагынхнаас зөвлөмж, туслалцаа авах, аялал жуулчлалын шинэ бүтээгдэхүүн, үйлчилгээ бий болгох зэрэг давуу талтай гэнэ.
