“Best of comedy 2014” наадмын улаан хивсны ёслолын үйл ажиллагааны фото сурвалжлага

"Best of comedy" хошин урлагийн нэгдсэн наадмыг анх 2012 онд улаан хивсний ёслол, хандивын тоглолтын арга хэмжээгээр хошин урлагийн зөвлөл зохион байгуулж байсан юм. Тэр үеэс хойш даруй хоёр жил өнгөрч энэ жил инээдмийн баярын өдрийг тохиолдуулан "Best of comedy" хоёрдугаар наадмыг ёслол төгөлдөр зохион байгууллаа.

Улаан хивсний ёслолд “Шинэ үе”, “Шилдэг өнгө”, “Х-Түц”, “Маск”, “Мөрөөдлийн театр”, “Эмоци”, “Чапи & Суурь” хамтлагийн уран бүтээлчид ар араасаа улаан хивсээр алхан Соёлын төв өргөөнд саатсан юм. Хошин урлагийн хамгийн ахмад жүжигчин “тогдгор” хэмээн нэрлэгддэг Гавьяат жүжигчин Д.Галсантогтох нийт үзэгчид уран бүтээлчиддээ инээдмийн баярын мэндчилгээ дэвшүүлэн залуу уран бүтээлчдийн хамт улаан хивсний ёслолын салхийг хагалан алхсан юм.

Түүний араас Гавьяат жүжигчин Б.Туяа, Гавьяат жүжигчин Г.Жагдаг, Аяа , Боёо, Аглуу, Бямбацогт, Баатархүү, Одноо, Бархүү, Баярмагнай, Өлзийхүү, Хүсэлбаатар, Эрдэнэзаан, Мөнхсайхан, Хүрэлээ, Төөтөө, Нарансолонго, Тэмүүжин, Гэрэлээ гээд үе үеийн хошин урлагийн уран бүтээлчид улаан хивсээр алхлаа.

Тэд нэгэн дээвэр дор нэгдэн чуулсан энэхүү тоглолтын анхны орлогоо Эх хүүхдийн эрүүл мэндийн үндэсний төвийн Сэхээн амьдруулах тасгийн хамт олонд хандив болгон өргөж байсан бол өнгөрсөн жил инээдмийн баяраар хийсэн нэгдсэн тоглолтын орлогоо мөн ЭХЭМҮТ-ийн Нярайн тасгийн хамт олонд хандивласан юм. Тэгвэл энэ удаад тэд нэгдсэн тоглолтынхоо хоёр өдрийн нийт орлогоо III амаржих газрын Нярайн тасгийн хамт олонд нярайн эндэгдлийг бууруулахад зориулан тоног, төхөөрөмжүүдийг бэлэглэхээр бэлдээд байгаагаа дуулгалаа.

Монголын хошин урлагийнханы нэгдсэн “The best of comedy” хандивын тоглолт өнөөдөр 19.00 цагт дахин Соёлын төв өргөөнд болох юм. Ингээд та бүхэндээ улаан хивсны ёслолын үйл ажиллагааны фото сурвалжлагыг хүргэж байна.