Сүүлийн үед алдартай жүжигчин И Жүн Жэгийн хиймэл оюуны технологиор үүсгэсэн зураг, нэрийг ашигласан романс залилангийн улмаас Өмнөд Солонгосын иргэд их хэмжээний мөнгөө алдах болжээ. Үүнтэй холбогдуулан жүжигчнийг төлөөлдөг “Artist Company” энэ долоо хоногийн лхагва гараг /2025.10.22/-т мэдэгдэл гаргасан байна.
“Сүүлийн үед манай жүжигчний нэрийг ашиглан бусдаас мөнгө нэхэх, санхүүгийн ашиг хонжоо хайх гэмт хэрэг гарах боллоо. Манай компани болон манай уран бүтээлчдийн аль нь ч ямар ч тохиолдолд бусдаас мөнгө болон санхүүгийн дэмжлэг хүсэхгүйг бид хариуцлагатайгаар мэдэгдэж байна” гэж уг мэдэгдэлд өгүүлжээ.
Компанийн мэдэгдэлд цааш нь “Хэрвээ танд ийм хүсэлт ирсэн бол залилангийн хохирогч болохгүйн тулд хариу өгөхгүй байх, илүү болгоомжтой хандахыг зөвлөж байна. Бид одоогоор баримт нотолгоонуудыг баталгаажуулахаар эрх баригчидтай хамтран ажиллаж байгаа бөгөөд уран бүтээлч болон шүтэн бишрэгчдийнхээ аюулгүй байдлыг хангахын тулд хатуу арга хэмжээ авч ажиллах болно” гэсэн байна.
Цагдаагийн байгууллагын өгсөн мэдээллээр хэсэг гэмт хэрэгтнүүд жүжигчний хиймэл оюуны технологиор бүтээсэн гэрэл зураг, жолооны үнэмлэхийг ашиглан 50 гаруй насны эмэгтэйчүүдээс нийтдээ 500 сая орчим воныг (370.000 ам.доллар) залилжээ. Одоо мөрдөгчид энэ хэргийн цаана Камбожид үйл ажиллагаа явуулдаг гэмт хэргийн бүлэг байгаа эсэхийг нягтлан шалгаж байгаа гэнэ.
