АНУ-ын хөгжмийн магнат Пи Дидди буюу Шон Комбс хүний биеийг үнэлүүлэх зорилгоор тээвэрлэсэн зэрэг хоёр зүйл ангид буруутай нь тогтоогдож, тус хэргийнхээ улмаас 50 сараар хорих ял сонссон юм. Хууль сахиулах албаныхан Пи Диддиг пүрэв гарагт /2025.10.30/ Нью-Жерси мужийн Форт Дикс шорон руу тээвэрлэжээ. Тэнд тэрбээр үлдсэн ялаа эдлэх юм.
Хэдийгээр тэр 50 сараар хорих ял сонссон ч гэсэн хоёр жил зургаан сар орчим хоригдоод суллагдана. Пи Дидди 2024 оны есдүгээр сард баривчлагдсанаасаа хойш болон шүүх хурал явагдаж байх хугацаанд АНУ-ын Бруклины “Метрополитан” цагдан хорих төвд хоригдож байсан юм. Хоригдсон 13 сарын хугацааг хасаж, Форт Дикст байх үедээ хар тамхины эмчилгээнд орох тул ялын хугацаа багасна. Ингэснээр тэрбээр 2028 оны тавдугаар сарын 8-нд суллагдах төлөвтэй байгаа гэж АНУ-ын Шоронгийн товчоо мэдэгджээ.
