“My voice” шоунаас урлагийн гараагаа эхлүүлж, олны танил болсон Ч.Мишээл багаасаа дуучин болохыг мөрөөдөж, мөрөөдлөө биелүүлэхийн тулд Монголын хүүхдийн ордны дуулаачийн дугуйланд суралцдаг байжээ. Улмаар 2016 онд UBS телевизээс зохион байгуулдаг “My voice” шоунд оролцон шилдэг 21 оролцогчийн нэгээр тодорсоноор олны хараанд анх өртсөн юм. Түүнчлэн “Боловсрол” телевизийн “Яг түүн шиг” шоунд оролцож, мөн л уянгалаг, хүчирхэг хоолой, өөрийн гэсэн өвөрмөц төрх, хэв маягаараа үзэгчдийг байлдан дагуулсан.
Тэрбээр “Санаж байна уу” хэмээх бие даасан анхны уран бүтээлээ сонсогчдод хүргэж, араас нь “Хүслээ бод”, “Чи амласан”, “Ээж” зэрэг уран бүтээлээ гаргасан. Түүнчлэн тэрбээр “Чи амласан” зэрэг хэд хэдэн дууныхаа шүлгийг өөрөө бичжээ. Сүүлийн нэг жил гаруйн хугацаанд тэрбээр “Bad blood”, “Дулаан байна”, “Бундан улаан”, “God is a woman” зэрэг уран бүтээлийг толилуулаад буй.
Яг одоогоор Ч.Мишээл Казахстан Улсад зохион байгуулагдаж буй “Silk Way Star“ олон улсын шоу уралдаанд Монгол Улсаа төлөөлөн оролцож байна. Уралдаанд 12 орны шилдэг дуучид өрсөлдөж буй бөгөөд одоогийн байдлаар Ч.Мишээл уралдааныг нийлбэр оноогоороо тэргүүлж буй.
