Э.Лхагва-Очирыг багад нь аав, ээж нь бүжгийн дугуйланд хичээллүүлжээ. Удалгүй аав нь түүнийг балетын дугуйланд, нагац ах нь Циркийн сургуульд шалгуултал аль алинд нь тэнцсэн байна. Ингээд акробатаар жил гаруй хичээллэсний дараа И.Жаргалсайхан багш нь түүнийг Төрийн соёрхолт, Ардын жүжигчин Т.Цэнд-Аюуш багш дээр хүргэж өгсөнөөр тэрбээр уран нугаралтаар хичээллэж эхэлжээ. Ингэж 1998 оноос тэрбээр уран нугарч, 2004 онд “Монте Карло” олон улсын циркийн тэмцээнээс хүрэл цом, 2012 онд Вьетнамд болсон олон улсын циркийн тэмцээнээс Алтан цом, 2013 онд Италид болсон “Голден циркус” фестивалиас мөнгөн цом тус тус хүртэж, дэлхийд алдартай “Нарны цирк”-д харьяалагдах болсон юм.
Дэлхийд Монгол Улсынхаа нэрийг дуурсгаж, монгол уран нугараачийн ур чадвар, авьяасыг гайхуулж яваа Э.Лхагва-Очир дан ганц урлагийн биш, спортод ч авьяастайгаа гайхуулаад авсан. 2021 онд тэрбээр бодибилдинг, фитнессийн спортоор хичээллэж, асар богинохон хугацаанд буюу ганцхан жилийн дотор хотын аварга, “Монголын мистер”, дэлхийн аварга болж шуугиулсан юм.
Тэрбээр 2016 онд “Сити” их сургуулийг жүжигчнээр төгссөн бөгөөд 2023 онд “Торгоны маань хээ”, 2024 онд “Хайрын домог” түүхэн уран сайхны киноны гол дүрээр үзэгчидтэй уулзсан.
Э.Лхагва-Очир 2024 онд олон улсын циркчдийн 22 дахь удаагийн наадамд амжилттай оролцож, Алтан цомын эзэн болсон юм. Тэрбээр тус наадамд дэлхийд анх удаа “Давхар сандлын тэнцвэр” төрлөөр 11 метрийн өндөрт тэнцвэрийн гайхамшгийг үзүүлжээ. Харин энэ оны долдугаар сард тэрбээр Монгол Улсын Гавьяат жүжигчин цол, тэмдгээр энгэрээ мялаасан юм.
Харин яг одоо Э.Лхагва-Очир өнгөрсөн аравдугаар сараас үзэгчдэд хүрч буй “Netflix”-ын “Physical Asia” цувралд Монгол Улсын багт багтан оролцсон нь түүнийг олон улсад улам таниулж, анхаарлын төвд оруулаад байна.
