МУСТА, МУЭ-ийн нэрэмжит шагналт зураач О.ДАРАМБАЗАР, МУСТА, Польш улсын Gloria Artis мөнгөн шагналт Б.ЛХАГВАЖАВ нарын хамтарсан Ф.Шопений хөгжмийг уран зурагт буулгасан “АЯЛГУУТ СОЛИР” үзэсгэлэн Blue Moon арт галерейн үзэсгэлэнгийн танхимд 2014.05.05-11-ны хооронд дэлгэгдэж та бүхний оюуны мэлмийг баясгаж байна.
Аливаа юмс үзэгдлийг хүний таван мэдрэхүй өөр өөрсдийнхөөрөө хүлээн авч, тархинд дамжуулан, буцааж бодол санаа, үйл ажиллагаа болгодог.
Уран зураг бол зөвхөн бодит юмс үзэгдлийг нэг цаг хугацааны агшинг хоёр хэмжээст орон зайд буулгадаг бол, хөгжим нь эхлэл, өрнөл, төгсгөл гэсэн цаг хугацааны хувьд үргэлжилсэн явцаар илэрдэг эгшиг хэмнэл юм.
Зураач О.Дарамбазар, Б.Лхагважав нар нь дэлхийн алдарт хөгжмийн зохиолч, төгөлдөр хуурч Фридерих Шопений хөгжмийн бүтээлүүдийг зурагт буулгах алхам хийсэн нь монголдоо төдийгүй дэлхийд ховор уран бүтээлийн үзэсгэлэн болж байна.
Уран бүтээлчид Польш улсад боловсрол эзэмшсэн нь Ф.Шопений төрсөн нутаг, соёл, уламжлал, түүхийг мэдэж мэдрэх, ухаарах таатай нөхцөл бүрджээ. Хүн төрлөхтөний сод бүтээл, оюун ухааны гайхамшгийн эгшиг болсон Шопений сэтгэлгээний бүтээлүүдийг дээрх хоёр зураачид өнгө гэрлийн илэрлээр уран зурагт буулгасан нь содон бөгөөд сонирхолтой бүтээл болсон ба МУСГЗ, Д.Нацагдоржийн нэрэмжит яруу найрагч Ц.Хуланд санал тавьснаар зурсан зургийн өнгө гэрлийг үгээр илэрхийлж, яруу найрагт буулгасан нь сэтгэлгээний эрэл хайгуулын сонирхолтой туршилт болжээ.
Энэхүү үзэсгэлэнд сонгодог хөгжим, уран зураг, яруу найргийг нэг агшин, нэг орон зайд огтолцуулсан 36 бүтээл дэлгэгдэх ба 8 бүтээлд зориулж яруу найрагч Ц.Хулан шүлэг бичсэн болно.
Үзэсгэлэнгийн үеэр 6 зураг нь MP3 тоглуулагчтай байх ба, үзэгчид Ф.Шопений бүтээлүүдээс тухайн зургийн хөгжмийг сонсох боломжтой бөгөөд үзэсгэлэн зохион байгуулагдах өдрүүдэд 18:00-19:00 цагийн хооронд Хөгжим Бүжгийн Коллежийн мэргэжлийн төгөлдөр хуурчдын 2-р уралдааны шагналтнууд тоглолт хийж, Фридерих Шопений болон дэлхийн бусад сонгодог хөгжмийн зохиолчдын бүтээлүүдээс сонсгох бөгөөд зөвлөхөөр МУАЖ, Төрийн хошой шагналт, хөгжмийн зохиолч Н.Жанцанноров ажиллаж байна.
Уг үзэсгэлэн 2014 оны 05-р сарын 05-11-ны хооронд “Blue moon” арт галерейн үзэсгэлэнгийн танхимд үргэлжлэх бөгөөд дэлгэрэнгүй мэдээллийг 89806021, 88773410 дугаарын утсаар лавлана уу.
www.URLAG.mn
