Дэвид Бекхэм хүү Бруклин Бекхэм эцэг эхээ шүүмжилсэн мэдэгдлийн дараа нэгэн ярилцлагынхаа үеэр хариу барьжээ.
Тэрбээр нэгдүгээр сарын 20-ны мягмар гарагт CNBC-ийн “Squawk Box” нэвтрүүлэгт оролцох үеэрээ сошиал медиа болон сэтгэцийн эрүүл мэндийн талаар ярьж, өмнөх өдөр нь Бруклин мэдэгдэл хийсэн талаарх сэтгэгдлээ хуваалцжээ. Тэрбээр мэдээж хүүхдүүд болсон хойно алдаа гаргадаг гэдгийг дурдаад “Би сошиал медиа, түүний нөлөөний талаар үргэлж ярьж ирсэн. Сайн тал ч бий, муу тал ч бий. Муу талын тухайд, өнөөгийн хүүхдүүд ямар контентууд хүлээн авч байгааг бид ярьдаг. Энэ нь мэдээж аюултай байх эрсдэлтэй. Гэхдээ би хувьдаа, тэр дундаа хүүхдүүдийнхээ хувьд, сошиалыг зөв зорилгоор ашиглах ёстой гэж боддог. Би өөрийн платформ, дагагчдаа Хүүхдийн сан UNICEF-ийн төлөө ашиглаж чадсан. Энэ нь дэлхий даяар хүүхдүүдэд тулгамдаж буй асуудлыг олон нийтэд таниулах хамгийн хүчтэй хэрэгсэл болсон” гэжээ.
Дараа нь тэрбээр эхнэр Виктория Бекхэмтэйгээ хамт өсгөж буй хүүхдүүдээ дурдсан байна. Тэд 26 настай Бруклин, 23 настай Ромео, 20 настай Круз, 14 настай Харпер гээд гурван хүү, нэг охинтой билээ.
“Би хүүхдүүдээ ч мөн адил хүмүүжүүлэхийг, тэдэнд аливааг ойлгуулахыг хичээсэн. Тэд алдаа гаргадаг. Гэхдээ хүүхдүүд алдаа гаргах эрхтэй. Ингэж байж л тэд суралцдаг. Би хүүхдүүддээ үүнийг л заахыг хичээдэг” гэжээ. Мөн “Заримдаа тэднийг тэр алдааг нь өөрсдөөр нь хийлгэж үзэх хэрэгтэй” хэмээжээ.
Дэвид саяхан Швейцарын Давос хотод болсон Дэлхийн эдийн засгийн форумын (WEF) 56 дахь удаагийн чуулганы үеэр хүүгийнхээ талаарх асуултаас зайлсхийж байжээ.
Дээрх нь Бруклин өөрийнх нь болон эхнэр Никола Пелц Бекхэмийн харилцааг санаатайгаар сүйтгэхийг оролдсон, “тоо томшгүй олон худал мэдээлэл тараасан” хэмээн эцэг эхээ буруутгасны дараа өгч буй Дэвидийн хариу тайлбар юм.
