Монгол, Италийн уран бүтээлчдийн хамтарсан “Төв шилжих үед” үзэсгэлэн Г.Занабазарын нэрэмжит Дүрслэх урлагийн музейд олны хүртээл болж байна.
“Төв” хэмээх ойлголтыг тогтсон, хөдөлшгүй цэг бус, харин орон зай, цаг хугацаа, хүртэхүйн туршлагаар түр хугацаанд бүрэлдэн бий болдог хувьсамтгай нөхцөл хэмээн авч үздэг аж.
Үзэсгэлэн нь инстолляци, баримал, видео зэрэг хэлбэрээр дамжин шилжилт хөдөлгөөний тухай эргэцүүллийг зөвхөн бэлгэдэл, хэл зүйн түвшинд бус, экологийн болон түүхэн хэмжээсээр нь тэлж байгааг илэрхийлж буй.
Монголд Улсад суугаа Итали Улсын ЭСЯ-наас орчин үеийн Италийн соёл, урлаг, дизайн, загвар, хөгжим, амьдралын хэв маягийг таниулах “Италийн долоо хоног” үйл ажиллагаа энэ сарын 9-15-нд зохион байгуулж байна. Тус ажлын хүрээнд “Төв шилжих үед” үзэсгэлэнг дэлгээд байна. “Төв шилжих үед” үзэсгэлэнд орчин үеийн уран бүтээлч Лука Буволи, Пиетро Руффо, Э.Бэхбаатар нарын бүтээлийг нэгтгэн толилуулж байгаа аж. Италид суралцаж, уран бүтээлээ туурвиж буй монгол уран бүтээлч Э.Бэхбаатар эх орондоо анх удаа бүтээлээ танилцуулж буйгаараа онцлогтой.
Уг үзэсгэлэн энэ сарын 15-ныг хүртэл үргэлжилнэ.
Гэрэл зургийг Г.Мөнх-Од
Эх сурвалж: МОНЦАМЭ агентлаг
