Их Монгол Улс байгуулагдсаны 808, Ардын хувьсгалын 93 жилийн ой, Үндэсний их баяр наадмын үйл ажиллагааны нийт зардлыг 2.2 тэрбум төгрөг байхаар Засгийн газрын ээлжит хуралдаанаар баталлаа.
Үүнээс 369.9 сая төгрөгийг баяр наадмын үйл ажиллагааны орлогоос, 500 саяыг нийслэлийн төсвөөс, 57 сая төгрөгийг өнгөрсөн оны баяр наадмын үйл ажиллагааны орлогын давалтаас санхүүжүүлж, дутагдаж буй 1.2 сая төгрөгийг Засгийн газрын нөөц сангаас гаргахаар болжээ.
Наадмын нийт зардлын 921.2 сая төгрөг буюу 13.1 хувь нь бай шагналд, 946 сая төгрөг буюу 42.8 хувь нь урлаг, соёл, хүндэтгэлийн арга хэмжээнд, 494 сая төгрөг буюу 22.4 хувь нь тохижилт, үйлчилгээний зардалд, 142.5 сая төгрөг буюу 6,4 хувь нь хэв журам хангах, онцгой байдлын зардалд, 333.9 сая төгрөг буюу 15.1 хувь нь наадмыг зохион байгуулах бусад арга хэмжээний зардалд зарцуулагдах юм байна.
Үндэсний их баяр наадмын үйл ажиллагааны зардалд өнгөрсөн жил 3.8 тэрбум төгрөг төсөвлөж байсан бол 2012 онд бай шагнал, зохион байгуулалтын бүхий л арга хэмжээнд 797.8 сая төгрөг төсөвлөн зарцуулсан байх юм.
Харин эдийн засгийн хүндрэлтэй байгаа энэ жил наадмын нийт зардлыг өмнөхөөс 1.6 тэрбум төгрөгөөр багаар төсөвлөжээ.
