“Playtime 2014” наадмыг энэ жил нийслэл Улаанбаатар хот үүсч байгуулагдсаны 375 жилийн ойн хөтөлбөрийн хүрээнд “Найрсаг Улаанбаатар биднээс эхлэнэ!” уриан дор ирэх долдугаар сарын 19, 20-нд Монгол Шилтгээнд зохион байгуулагдах гэж байна.
13 дахь жилдээ зохион байгуулагдах тус наадам нь Улаанбаатар хотын орчин үеийн хөгжмийн соёлыг хөгжүүлэх, залууст амралт чөлөөт цагаа цэвэр агаарт, байгаль орчинд ээлтэй хэлбээр өнгөрүүлэх, дэлхийн болон Монголын шинэ, шилдэг амьд хөгжмийн хамтлаг дуучдыг танилцуулах замаар тэдний хөгжмийн боловсролыг дээшлүүлэх зорилготой аж.
Амьд хөгжмийн “Playtime 2014” наадмын хүрээнд ОХУ-ын “Мумий Тролль”, Японы “Envy” болон Английн “The Wombats” зэрэг дэлхийн алдарт амьд хөгжмийн хамтлагууд ая дуугаа өргөн хэмнэл нэмэх нь ээ. Мэдээж наадамд Монголын шинэ, шилдэг 30 гаруй хамтлаг дуучид оролцож, өөрсдийн уран бүтээлээ толилуулах юм.
Наадамд хүрэлцэн ирснээр хотын залуус орчин үеийн урлагийн үзүүлбэр, үзэсгэлэн, сургалт, галын наадам зэрэг олон сонирхолтой арга хэмжээнд оролцохоос гадна Монгол Шилтгээн, майхан хотхон, бүх төрлийн хоол, ус ундааны үйлчилгээг цогц хэлбэрээр хүртэнэ. Мөн WiFi, автобус, авто машины зогсоол, ариун цэвэр, аюулгүй байдалтай холбоотой үйлчилгээг үнэ төлбөргүй хүртэх боломжтой юм байна.
Энэ жилийн “Playtime” 2014 наадам “VIP zone”-ыг анх удаа оролцогчиддоо санал болгож байгаа бөгөөд тус үйлчилгээгээр дамжуулан оролцогч залуус дэлхийн болон Монголын шилдэг амьд хөгжмийн уран бүтээлчидтэй танилцаж, тэдэнтэй хамт нэгэн оройг ая тухтай орчинд өнгөрүүлэх боломжтой гэсэн шүү.
“VIP Zone” тасалбарыг өчигдрөөс эхлэн “Хай-Фай Рекордс”-ын салбаруудаар 100 мянган төгрөгөөр худалдаалж эхэлжээ.
Мөн “Replay” буюу наадмын үеэр хотын залуус хог хаягдалаа хэрхэн багасгаж, зөв зохистой ашиглаж, өөрсдийн бүтээлч сэтгэлгээг хөгжүүлэх урлагийн хөтөлбөрийг хэрэгжүүлэх юм. Ингэснээр наадмын үеэр байгаль орчинг бохирдуулахаас зайлс хийж, хотын залуус болон хамтран ажиллаж буй байгууллага хамт олны Улаанбаатар хотын өнгө үзэмж, төрхийг найрсаг хот болгон хөгжүүлэхэд оруулах хувь нэмрийг оруулах нь ээ.
Наадмын тасалбар энэ сарын 19-нөөс эхлэн www.easyticket.mn, “Хай-Фай Рекордс”-ын салбаруудаар худалдаалж эхэлсэн юм. Мөн ирэх долдугаар сарын 9-ний дотор тасалбар худалдан авсан залуус нэг өдрийн тасалбарыг 30 мянган төгрөг хоёр өдрийн тасалбарыг 40 мянган төгрөгөөр борлуулах бол долдугаар сарын 18-ны дотор тасалбар худалдан авсан залуус нэг өдрийн тасалбарыг 35 мянган төгрөг, хоёр өдрийн тасалбарыг 55 мянган төгрөгөөр борлуулах юм байна.
Наадмын үеэр нэг өдрийн тасалбарыг 40 мянган төгрөг, хоёр өдрийн тасалбарыг 60 мянган төгрөгөөр борлуулах нь ээ. Мөн 1900-1199 утсаар үнэгүй хүргэж өгөх юм байна.
www.URLAG.mn
