Дуучин Рианнагийн Беверли Хиллс дэх гэр лүү нэгэн этгээд буудсан хэрэг өнгөрсөн ням гаригт /2026.03.08/ гарсан билээ. Хэргийн эзэн болох Флорида мужаас гаралтай 35 настай эмэгтэйг хэд хэдэн зүйл ангиар буруутгаж байна. Тодруулбал, Иванна Лисетт Ортизыг хүн амины хэрэг үйлдэхийг завдсан, хагас автомат галт зэвсэг ашиглан хүн рүү халдсан, хүн амьдардаг байшин руу буудсан хэргүүдэд тус тус буруутгаж байгаа бөгөөд эдгээр нь бүгд хүнд гэмт хэрэг юм.
Тухайн үед Рианна нөхөр, гурван хүүхэд, ээжийнхээ хамтаар гэртээ байсан.
Иванна Лисетт Ортиз нь 10 гаруй жил хэл ярианы эмгэг судлаачаар ажилласан хүн. Түүнийг Рианна эсвэл дуучны гэр бүлтэй ямар нэг холбоотой эсэхийг албаныхан мэдээлээгүй. Мөн буудсан шалтгаан нь ч хараахан тодорхой болоогүй байна.
Ортизын шүүх хурал энэ сарын 25-нд болох ба тэр хүртэл түүнийг цагдан хорьж байна. Хэрвээ Ортиз 1.8 сая ам.долларын барьцаа төлвөл шүүх хурал хүртэл суллагдаж болох аж.
