Өнгөрсөн 2025 онд БНСУ-ын “Physical Asia” шоу азийг байлдан дагуулсан билээ. Тэгвэл тус шоутай адил дуу, хөгжмийн “Hangang Campus Song Festival 2026” олон улсын уралдааныг БНСУ-ын Сөүл хотод “Korean Broadcasting System” болон “Jeju National University”-иас хамтран зохион байгуулж байгаа юм байна.
Тус уралдаанд олон орны нийт 189 хамтлаг оролцож байгаагаас Монгол Улсыг төлөөлж, Соёл урлагийн их сургуулийн дэргэдэх “Нар-Анир” хамтлаг үндэсний болон орчин үеийн хөгжмийн элементийг хослуулсан уран бүтээлээрээ оролцож эхний шатны шалгаруулалтаа амжилттай давж, шилдэг 15-д шалгарчээ.
“Hangang Campus Song Festival 2026” олон улсын уралдааны дараагийн шатны шалгаруулалт буюу шилдэг 5 хамтлагийг шалгаруулах шат 2026 оны дөрөвдүгээр сарын 11-ний өдөр БНСУ-ын Сөүл хотод болох бөгөөд “Нар-Анир” хамтлаг биечлэн оролцохоор хүлгийн жолоо залах нь ээ.
Дашрамд танилцуулахад “Нар-Анир” хамтлагийн ахлагчаар дуучин А.Ууганзаяа, хамтлагийн гишүүдээр морин хуурч, хөөмийч Б.Баярбаатар, хэл хуурч, бүжигчин Б.Батням, гитарчин, хөгжмийн найруулагч Д.Очсүрэн нар ажилладаг бөгөөд уран бүтээлийн чанар, шинэлэг хэв маяг, үндэсний өнгө аясыг орчин үеийн хөгжимтэй хослуулсан онцлогоороо ялгарч, цаашид дотоод, гадаадын тайзнаа Монголын хөгжмийн урлагийг сурталчлан таниулах зорилготой ажиллаж байгаа аж.
Ийнхүү бүх монголчуудаараа “Нар-Анир” хамтлагаа шилдэг таван хамтлагийн нэгээр үлдэж, шилдгийн шилдэг хамтлаг болох ерөөл өргөе.
