Блэйк Лайвли “It Ends With Us” нэртэй романс кинонд хамт тоглосон Жастин Балдониг бэлгийн дарамт үзүүлсэн хэмээн буруутган шүүхэд зарга үүсгэсэн. Тэгвэл АНУ-ын холбооны дүүргийн шүүгч Люьис Лиман бэлгийн дарамт үзүүлсэн гэх заргыг хэрэгсэхгүй болгосон байна. Блэйк 13 зүйлээр шүүхэд хандсанаас гурваар нь л заргалдаж болно гэж шүүгч үзжээ. Бэлгийн дарамтын хэргийг шүүх харьяаны асуудлаас болж хэрэгсэхгүй болгосон байна.
Кино зураг авалтын үеэр Жастин ёс бус уур амьсгал бий болгон бэлгийн дарамт үзүүлж, дараа нь энэ талаар шүгэл үлээх гэхэд түүнийг болон бусад хүний дуу хоолойг дарах гэж оролдсон хэмээн Блэйк шүүхэд зарга үүсгэсэн. “It Ends With Us” кинотой холбоотой энэхүү дуулиант хэрэг анх дэгдэхэд Блэйк Жастин руу сээтэгнэсэн маягтай бичсэн мессежүүд ил болсон юм.
Жастинийг төлөөлж буй өмгөөлөгч Александра Шапиро, Жонатан Бах нар “Шүүгдэгч Жастин Балдонигийн эсрэг үүсгэсэн бэлгийн дарамт учруулсан гэх заргыг хэрэгсэхгүй болгосонд, мөн Жэйми Хит, Стив Каровиц, Мелисса Нэйтан, Женнифер Эйбел нарын эсрэг үүсгэсэн заргуудыг түдгэлзүүлсэнд баяртай байна” гэжээ.
