Монгол Улсад согтууруулах ундааны хэрэглээ өндөр хэвээр байгааг харуулсан судалгааны дүн анхаарал татаж байна. Нэг хүнд жилд дунджаар 35 литр спирт оногдож байгаа нь дэлхийн дунджаас (5–8 литр) хэд дахин өндөр үзүүлэлт юм.
Энэхүү нийгмийн тулгамдсан асуудлыг хөндсөн “Амьдралд хайртай” уран сайхны кино дөрөвдүгээр сарын 10-наас эхлэн бүх кино театруудаар гарч эхэлнэ.
“Яруу арт” продакшны бүтээл тус кино нь сэтгэл гутрал, хүнд нөхцөл байдлаас үүдэн архинд донтох болсон эмэгтэйн амьдралын түүхийг өгүүлж, хүний амьдралд зөв дэмжлэг, үг, оролцоо ямар чухал болохыг харуулах юм. Мөн аливаа бэрхшээлийг хорт зуршлаар бус, ухаан, тэвчээр, хайр сэтгэлээр даван туулахыг уриалсан агуулгатай.
Кинонд жүжигчин Х.Цасчихэр, Г.Золзаяа, Г.Чулуунцэцэг, М.Саранцэцэг, Б.Батмэнд нар болон 50 гаруй уран бүтээлч оролцжээ.
Ийнхүү нийгмийн эмзэг асуудлыг урлагаар дамжуулан хөндсөн энэхүү бүтээл үзэгчдийн хүртээл болоход бэлэн боллоо.
