“Crash Landing on You” цувралын жүжигчин Хён Бинийг Өмнөд Солонгосын Үндэсний тагнуулын албаны хүндэт сөрөх тагнуулын ажилтнаар томилжээ. Энэ нь саяхны хууль эрх зүйн өөрчлөлтөөс үүдэлтэйгээр сөрөх тагнуулын талаарх олон нийтийн мэдлэгийг дээшлүүлэх зорилготой үйл ажиллагаа юм.
Өмнөд Солонгосын Үндэсний ассамблей өнгөрсөн хоёрдугаар сард Эрүүгийн хуулийг шинэчилж, тагнуулын гэмт хэргийн талаарх ойлголтыг өргөжүүлсэн. Нэмэлт өөрчлөлтийн дагуу тагнуул гэдэг нь зөвхөн дайсагнагч улсаар зогсохгүй бусад гадаадын улс болон түүнтэй адилтгах байгууллагуудын явуулсан үйл ажиллагааг хэлнэ. Өмнөд Солонгосын аюулгүй байдал эсвэл үндэсний ашиг сонирхлыг алдагдуулж болзошгүй аливаа гадаад мэдээллийн үйл ажиллагааг илрүүлэх, таслан зогсоох нь сөрөх тагнуулын үүрэг.
Сөрөх тагнуул нь зөвхөн Хойд Солонгосын агентуудыг илрүүлдэг гэсэн олон нийтийн ойлголтыг өөрчлөхөд Хён Бин хувь нэмрээ оруулах юм.
Өмнөд Солонгосын Үндэсний тагнуулын албаны мэдээлснээр сүүлийн үед гадаадын этгээдүүдийн дэвшилтэт технологи, батлан хамгаалах салбарын нууцыг хулгайлах оролдлоготой холбоотой хэргүүдийн тоо нэмэгдэж байгаа аж.
Хён Бинийг сонгосон шалтгаан нь 2023 онд гарсан “The Point Men” кинотой холбоотой. Тус кинонд Хён Бин Ойрхи Дорнодын зэвсэгт бүлэглэлээс Өмнөд Солонгосын барьцаалагдсан хүмүүсийг аврахын тулд дипломат албаныхантай хамтран ажиллаж буй Үндэсний аюулгүй байдлын албаны офицерын дүрийг бүтээжээ.
