“Би эстрадын дуучин” улсын 20 дахь удаагийн уралдаанд Булган аймгийн Спортын төрөлжсөн сургалттай ерөнхий боловсролын сургуулийн сурагч Б.Наранцацралт “Амьдрал” дуугаараа шилдгийн шилдгээр шалгарч, гранпри шагналын эзэн боллоо. Түүнд мөн СУИС-д суралцах урилга гардуулжээ.
Б.Наранцацралтыг Булган сумын Соёлын ордны хөгжмийн багш Б.Хишигбат бэлтгэсэн байна.
“Би эстрадын дуучин” уралдааны анхан шатыг аймагтаа зохион байгуулж, дөрвөн насны ангилалд 137 хүүхэд авьяас билгээ сорьсноос тэргүүн байр эзэлсэн шилдэг дөрвөн хүүхэд улсын уралдаанд оролцсон байна.
Хүүхэд, багачуудын дуулах ур чадварыг хөгжүүлэх, Монгол эстрадын дууны урын санг баяжуулах, ирээдүйн авьяаслаг дуучдыг нээн илрүүлэх зорилготой “Би эстрадын дуучин-2026” гоцлол дууны улсын уралдааныг дөрөвдүгээр сарын 10-12-ны өдрүүдэд зохион байгуулсан юм.
Хоёр жил тутамд нэг удаа зохион байгуулдаг “Би страдын дуучин болно” улсын уралдааны 20 жилийн ой тохиож буйгаараа онцлог бөгөөд энэ жил өргөн дэлгэр болж 18 аймаг, долоон дүүргээс нийт 96 сурагч оролцож, дөрвөн насны ангиллаар авьяас чадвараа сорин өрсөлдсөн юм.
