Дэлхийн хамгийн том видео стриминг платформ “Нэтфликс”-ийг үүсгэн байгуулагч Рид Хастингс энэ оны зургаадугаар сард төлөөлөн удирдах зөвлөлийн даргын албан тушаалаасаа буух болсныг зарлажээ.
Энэ жил 65 нас хүрч байгаа Хастингс тухайн үед “Pure Software” компанийн ажилтан байсан Марк Рандольфтой хамтран 1997 онд “Нэтфликс”-ийг үүсгэн байгуулсан юм. Тэд эхлээд АНУ-ын зах зээлд DVD кино түрээсийн үйлчилгээг нэвтрүүлж байсан бол одоо технологийн хөгжлийн дагуу хувьсан өөрчлөгдсөөр видео стримингийн үйлчилгээ үзүүлэгч болжээ.
“Нэтфликс”-ийн удирдах зөвлөлөөс гаргасан мэдэгдэлд өгүүлснээр Рид Хастингс одоо компанийн үйл ажиллагаанд оролцохгүй, хүмүүнлэгийн ажилд гол анхаарлаа төвлөрүүлэх гэнэ.
Түүний олон жилийн хичээл зүтгэлийн үр дүнд өнөөдрийн “Нэтфликс”-ийн инновацын соёл бий болсон, дэлхий нийтийн зугаацах хэв маягийг түүний алсын хараа, манлайлал тодорхойлсон болохыг дээрх мэдэгдэлд бас магтан бичжээ.
Рид Хастингсийн хөрөнгийн хэмжээ сүүлийн байдлаар 5.8 тэрбум ам.доллар байгаа. Үүний бараг тал орчмыг түүний “Нэтфликс” компанид эзэмшдэг 0.5 хувийн үнэлгээ бүрдүүлдэг аж.
