БНСУ-ын “Winner” хамтлагийн реп дуучин Мино буюу Сун Мин Уд цэргийн дүйцүүлэх албаны хуулийг зөрчсөн хэргээр нэг жил, зургаан сарын хорих ял оноохыг Прокурорын газраас шаардлаа.
Мино 2023 оны гуравдугаар сард цэрэгт татагдсан ч албаа дүйцүүлэх буюу нийгмийн ажилтны ажлаар хаахаар болсон. Гэвч ажлын 430 хоногоос 102 хоногийг тасалсан. Цэргийн албаныхаа үеэр элдэв үдэшлэг, хүлээн авалтад очиж, АНУ-д дүүгийнхээ хуримд зочилж, машины осолд хүртэл ороод амжсан байна.
Мино буруугаа бүрэн хүлээж, Шүүхэд хандан “Дахин цэргийн алба хаах” хүсэлт гаргасан ч Прокурорын газраас түүнийг заавал биечлэн хорих ялаар шийтгэх шаардлага гаргаад байна. Мөн түүний арми дахь албыг хариуцсан И Мапо гэдэг ажилтныг ч мөн шүүх хурал үргэлжилж байна.
Прокурор “Хэрэгтэн ганц нэг өдрөөр биш маш олон хоногоор ажлаа тасалж байсан. Цэргийн алба огт хаагаагүй гэж үзэхэд болно. Мөн алба хааж, ажил хийж байгаа мэт хуурамч баримт бүрдүүлж байсан нь ялыг хүндрүүлэх шалтгаан болж байна” гэжээ.
Одоогийн хууль ёсоор нийгмийн ажилтан хүндэтгэх шалтгаангүйгээр найм хоног ажил таслахад гурван жилийн ял хүлээдэг. Харин Мино 102 өдөр тасалсан гэхээр хэрэг хүндрэх нь ойлгомжтой.
Миногийн өмгөөлөгч “Миний үйлчлүүлэгчийн эрүүл мэндийн байдлыг авч үзэхийг хүсэж байна. Тэрбээр хоёр туйлт сэтгэцийн эмгэг болон сандралын эмгэгтэй. Бас хүзүүндээ хүнд гэмтэлтэй байсныг авч үзээч. Түүнд шударга иргэн болох боломж олгооч” гэсэн хүсэлт гаргажээ.
Шүүх хурал дээр Мино сүүлийн үг дээрээ “БНСУ-ын иргэн бүр гүйцэтгэх ёстой эх орноо хамгаалах үүргээ би дуустал нь биелүүлж чадсангүй. Би хоёр туйлт сэтгэцийн эмгэг болон сандралын эмгэгтэй. Гэхдээ энэ нь өөрийгөө өмөөрсөн хэрэг болно гэдгийг ойлгож байна. Олон нийтийн танил хүн гэдгээрээ би бусдад үлгэр жишээ үзүүлэх ёстой байлаа. Хэрэв надад цэргийн алба дахин хаах боломж олговол би үнэн сэтгэлээсээ хаахад бэлэн байна. Уучлаарай. Ямар ч шийтгэл оноосон хүлээн авах болно” гэж хэлсэн байна.
