“Зэв” фильмийн залуу уран бүтээлчид “МАД” уран сайхны кино бүтээснээ дөрөвдүгээр сарын 24-нөөс бүх кинотеатруудаар үзэгчдэд хүргэх гэж байна.
Адал явдалт “МАД” уран сайхны кинонд загвар өмсөгч, жүжигчин О.Амгаланбаатар дүр бүтээжээ. Түүний хувьд “Учиртай гурав” кинонд анх тоглосноор жүжигчний карьераа эхлүүлсэн юм. Түүнээс хойш “Содура”, “Бид гурвын болзоо”, “Нүдэн сондор”, “Говийн домог”, “Хиртээгүй сарнай”, “Бэрүүд”, “Үүрдийн хайр” гэхчилэн бүрэн хэмжээний болон олон ангит уран бүтээлүүдэд гол болон туслах дүр бүтээсэн. Тэрбээр энэ удаа “Зэв”фильмтэй хамтарч, “МАД” уран сайхны киногоор дэлгэцнээ эргэн ирж байна.
Ташрамд дурдахад, “МАД” уран сайхны киноны найруулагчаар Б.Буянбат ажиллаж, дүрүүдэд “Маск” продакшны жүжигчин Ц.Ганзориг, Тувагийн Ардын жүжигчин, ОХУ-ын Гавьяат жүжигчин, тайз, дэлгэцийн хүчирхэг уран бүтээлч Эдуард Ондар,“Орлон тоглогч”, “Надад ирээгүй хайр” олон ангит киноны дүрээрээ үзэгчдийн эчнээ танил болсон жүжигчин Ч.Түвшинтөгс, жүжигчин Б.Батмэнд, С.Хонгорхүү,“Эрхэм элч” продакшны захирал, Гавьяат жүжигчин С.Лхагвасүрэн, өнөө цагийн эсрэг дүрийн мастер Э.Батнямбуу, жүжигчин, Улсын хүүхэд, залуучуудын театрын жүжигчин Т.Золжаргал, залуу уран бүтээлч А.Эгэлзаяа, Э.Төгөлдөр нар тогложээ.
