С.Амармандах нь алдарт бүжиг дэглээч Ц.Сэвжидийн ач хүү, Төрийн шагналт С.Сүхбаатарын хүү бөгөөд гурван үе дамжсан уран бүтээлч юм. Хөгжим бүжгийн коллежийг бүжигчнээр төгссөн тэрбээр 1992 онд Маадай буюу Б.Баяржаргалтай хамтран “Хар сарнай” хамтлагаа байгуулсан нь Монголд реп техно урсгалыг оруулж ирсэн анхны хамтлаг байв. Тус хамтлаг “Бүтээнэ сөнөөнө”, “Дайтна ч би, мөргөнө ч би”, “Хас”, “Тэнгэрийн тамга”, “Би Монгол хүн”, “Зүгээр л сонс”, “Great destroy” зэрэг цомогтой. Алдарт “Хар сарнай” хамтлаг Төрийн их наадмын нээлтэд долоон удаа оролцож байсны зэрэгцээ “Аз жаргал хүсье” дуугаа 800 хүүхдийн найралтай хамтран дуулж байв. Энэхүү дууныхаа үг, аяыг хамтлагийн гишүүд С.Амармандах, Б.Маадай нар хамтран зохиосон байдаг юм. Тэрбээр нийт дууныхаа шүлгийн 80 хувийг өөрөө бичжээ. Тэрбээр “Миний ихэнх уран бүтээл өвөг дээдсээ хайрлах ухаан, өв соёлоо дээдлэх утга санаа агуулгатай. Үүнтэй хамтатгаад цомог бүртээ агуу их яруу найрагчдын шүлгийг оруулдаг. Тухайлбал, их найрагч Б.Явуухулан гуайн “Би хаана төрөө вэ”, Р.Чойном, О.Дашбалбар гуайн шүлгийг магтан дуулж, хойч үедээ үлдээхийг зорьдог. Би өөрөө баатар. Харин миний үг бол сэлэм, жад нь ая, тэгэхээр энэ хоёрыг хослуулан би тулалддаг гэсэн үг” хэмээсэн. Түүнд 2022 онд Монгол Улсын Ерөнхийлөгчийн зарлигаар Гавьяат жүжигчин цол хүртээсэн билээ.
“Хар сарнай” хамтлагийн ахлагч, дуучин, бүжигчин С.Амармандах энэ өдөр мэндэлжээ
