Японы манга артист Tomato Soup-ийн “A Witch’s Life in Mongol” манга цувралыг дэлгэцийн бүтээл болгосон “Jaadugar: A Witch in Mongolia” анимэгийн хоёр дахь трэйлер цацагдаж, нээлтээ хийх өдөр нь ил болжээ.
CyberAgent компани, Science SARU анимэйшн студийн бүтээл тус цувралын эхний хоёр ангийг долдугаар сарын 4-нд Японд гаргахаар товлосон байна. Мөн ирэх сард Францын “Annecy” олон улсын анимэйшн уран бүтээлийн фестивальд өрсөлдөж, тусгай үзвэр толилуулах аж.
13 дугаар зууны үеийн Перс болон Монголын эзэнт гүрэнд “Jaadugar: A Witch in Mongolia”-ийн гол үйл явдлууд өрнөх юм. Тэр дундаа Өгэдэй хааны хатан Дөргөнэгийн төр барих хугацаанд ихээхэн нөлөөтэй байсан Фатимагийн тухай түүхэн эх сурвалжид үлдсэн баримтуудаас санаа авч тус анимэгийн гол дүрийг зохиомжилжээ. Ираны эртний Тус хотод амьдардаг Шитара хэмээх охин Монголын байлдан дагуулалтын үеэр Толуйн цэрэгт олзлогдон Хархорум хотод ирж байгаагаар цувралын үндсэн үйл явдал эхэлдэг байна.
“A Silent Voice”, “K-On!” зэрэг бүтээлүүдээрээ алдаршсан Наоко Ямада, “Dan Da Dan” цувралыг найруулсан Абель Гонгора нар “Jaadugar: A Witch in Mongolia”-ийн найруулагчдаар ажиллажээ. Түүнчлэн Шитарагийн дүрд Акира Сэкинэ, Фатимагийн дүрд Хоуко Кувашима, Өгэдэй хааны дүрд Хиро Шимоно, Толуй хааны дүрд Рёота Сүзүки, Дөргөнэ хатны дүрд Ами Кошимизү гэсэн жүжигчид дуу оруулсан байна.
