Тайз, дэлгэцнээ бүтээсэн олон дүрээр нь үзэгчид андахгүй, олон ч жил урлагт зүтгэж яваа Гавьяат жүжигчин У.Батбаатарын төрсөн өдөр өнөөдөр тохиож байна.
Тэрбээр сурагч ахуйгаасаа л жүжигчин болохоор шийдэж, 1983 онд дунд сургуулиа төгсөнгүүтээ Багшийн дээд сургуулийн (хуучин нэрээр) кино драмын ангид шалгуултал тэнцээгүй аж. Харин Багшийн дээд сургуулийн коридорт яах учраа ч олохгүй зогсож байхад нь дэргэдүүр нь нэрт найруулагч Г.Доржсамбуу явж таарч, цаасан дээр нэг юм бичээд өгч явуулсан нь “Энийг аваад Хүүхэд, залуучуудын театрт оч. Хоёр жилийн дараа дахин ирж шалгуул” гэсэн бичиг байжээ.
Л.Лхасүрэнд хаягласан өнөөх зурвасаа бариад л Хүүхэд, залуучуудын театрт очиж, дуулж, бүжиглэж, шүлэг уншиж, ёстой байдгаа шавхаж байж дагалдан жүжигчнээр ажиллах зөвшөөрөл авсан байна. Ажилд орсон эхний өдрөө л Д.Батбаярын “Гэгээ” жүжгийн олны хэсэгт гарч уран бүтээлийн замналаа эхлүүлжээ.
Хүүхэд, залуучуудын театрт хоёр жил ажиллаад, 1985 онд Багшийн дээд сургуулийн кино драмын ангид элсэж, сургуулиа төгсөөд Дундговь аймгийн театрт хуваарилагдаж, үргэлжлүүлэн Армийн драмын театрт уригдан очжээ. Энэ хугацаанд тэрбээр 50 гаруй жүжгийн гол болон туслах дүрд тоглосон байна.
Харин дэлгэцийн уран бүтээлийн тухайд У.Батбаатар 1984 онд “Их замын тоос” киноны Тулгаа гэж дүрд тоглож гараагаа эхэлсэн бөгөөд түүнээс хойш “Мөнх тэнгэрийн хүчин дор”, “Диваажингаас амьдралд хүрэх зам”, “Жинжиймаа”, “Цэн тогоруу”, “Замбуулин дуусах болоогүй”, “Маш нууц”, “Шүүдэр дундуур”, “Задлаагүй захиа гэхчилэн 100 хол илүү гарах уран сайхны кинонд дүр бүтээжээ.
