Тайванийн алдарт жүжигчин, дуучин DJ Koo-гийн талийгаач эхнэр, жүжигчин, хөтлөгч Барби Сюй буюу Сюй Сиюаний нэрээр нэгэн солирын одыг нэрлэжээ.
Хонконгийн “Sing Tao Daily” зэрэг хэвлэлд мэдээлснээр, Олон улсын одон орон судлалын холбооны Жижиг биетийн нэршлийн ажлын хэсгийн саяхны хурлаар 208663 дугаартай солирыг албан ёсоор “Сюй Сиюань” гэж нэрлэсэн байна.
Уг солирыг 2002 оны дөрөвдүгээр сарын 12-нд Хонконгийн одон орон судлаач Квон Вай Енг АНУ-ын Аризона мужид анх илрүүлсэн байна. Анх илрэх үедээ уг биет “2002 GF11” гэсэн түр нэршилтэй байжээ. Харин одоо талийгаач Барби Сюйгийн нэрээр нэрлэгдлээ.
Одон орон судлаач Квон Вай Енг нь 2,000 гаруй солир илрүүлсэн гэдгээрээ танигдсан юм. Тэрбээр өмнө нь хятад хэлт ертөнцийн алдарт уран бүтээлчдийн нэрээр сансрын биетүүдийг нэрлэж байсан. Тухайлбал, Брижитт Лин, Энди Лау, Лесли Чюнг зэрэг алдартнуудын нэрээр нэрлэсэн тохиолдол бий.
