Пол Маккартни 84 нас хүрлээ

Жеймс Пол Маккартни 1942 оны энэ өдөр Ливерпүүл хотод төрсөн байна. Эцэг Жим Маккартни нь машины үйлдвэрийн хаягдал боловсруулах хэсгийн байцаагч, 30-аад оны жааз хөгжимчин, ээж Мэри нь эмнэлэгт нярайн сувилагч хийдэг байв. Пол багадаа томоотой, бие даасан чанараараа магтагддаг, дипломат зан чанартай хүүхэд байсан гэдэг. Бага сургуульдаа хамгийн шилдэг нь байсан Пол төгөлдөр хуураар хичээллэдэг байж.

Түүнийг 14 настай байхад буюу 1956 оны аравдугаар сарын 31-нд ээж нь нас барж амьдралд нь уй гуниг тохиожээ. Сэргэлэн цовоо Пол нэг хэсэг сүмд идэвхтэйгээр сүсэглэх болж, удалгүй ааваасаа гитар авч өгөхийг гуйсан байна. Пол солгой байсан учраас гитарын чавхдсуудыг нь сольж байрлуулж, толинд харж гитар тоглож сурчээ. Гитар Полын амьдралыг өөрчилсөн юм. Тухайн үед түүний шүтээн нь Литтл Ричард, Элвис Пресли, “Everly brothers” гээд рок-н-роллын нэртэй одууд байлаа. Нэг удаа найзуудтайгаа “Quarrymen” гэдэг хамтлагийн тоглолтыг үзэж, тэнд Жон Леннонтой танилцсан байна. Ингэж алдарт “The Beatles” хамтлаг байгуулагдах эхлэл тавигджээ.

1979 оны аравдугаар сард “Гиннес”-ийн амжилтын номыг хэвлэгчид Пол Маккартнид бүх цаг үеийн, бүх ард түмний дууны зохиолч, алдартай хөгжимчин, олон удаагийн алтан цомгийн эзэн хэмээх шагналыг гардуулжээ. Өнгөрсөн 2024 онд тэрбээр Их Британийн хөгжмийн салбарын анхны тэрбумтан болсон юм.