“The Voice Of Mongolia” шоуны ялагч, дуучин Г.Даваадалай бие даасан уран бүтээлийн замналаа эхлүүлж буйгаа зарлаж, анхны цомгоо гаргахаар болжээ. Үүнээс урьтаж “Cosmic Ocean” нэртэй тоглолтоо зургаадугаар сарын 19-нд “Ballroom ZU”-д толилуулахаар болоод байна.
Түүний анхны цомгийн продюсероор гитарчин Б.Үйтүмэн ажилласан бөгөөд энэ онд багтаан сонсогчдын хүртээл болох юм. Энэ цомгийнхоо талаар тэрбээр “Хүн бүр өөр өөрийн онцлогтой ч бид бүгд нэг ертөнцөд зэрэгцэн оршдог. Үүнтэй адил миний дуунуудыг сонсоход өөр өөр хэв маягтай мэт боловч сонсогчид дотроос нь миний гэсэн нэг л мөн чанарыг олж харна. Эсвэл өөрийнхөө сэтгэл, дурсамж, мэдрэмжийн нэг хэсгийг олж сонсох болов уу… Тиймдээ ч ертөнцийн олон өнгө, хэлбэр дүрс болоод өөрийн нэрэн дэх “Далай”-г бэлгэдсэн. Энэ цомог бол миний сонсож өссөн хөгжим, тэдгээрээс авсан мэдрэмж, нөлөөллөөрөө өөрийгөө хөглөж ирсэн замналын минь үр дүн. Нэг ёсондоо энэ цомог бол уран бүтээлч болоод хувь хүний хувьд ч жинхэнэ “би”-г хамгийн тодорхой харуулах бүтээл юм” гэжээ.
