“Lilo & Stitch”, “The Ring” зэрэг уран бүтээлээрээ үзэгчдэд танигдсан Дэйви Чейз 35 насандаа таалал төгсжээ.
Дэйви Элизабет Чейз дөрвөн настайгаа уран бүтээлийн замналаа эхлүүлсэн бөгөөд 11 настайдаа буюу 2001 онд “Donnie Darko” кинонд Саманта Даркогийн дүрд тоглосноор олны танил болсон юм. Үргэлжлүүлэн “Studio Ghibli”-ийн “Spirited Away” (2001) киноны Чихиро Огиногийн дүрд англи хэлээр дуу оруулж, мөн “Walt Disney” студийн алдарт бүтээл “Lilo & Stitch” (2002) хүүхэлдэйн кинонд Лило Пелекайн дүрд дуу оруулан, хамгийн алдартай бяцхан жүжигчдийн нэг болж байлаа.
2002 онд Дэйви Чейз “The Ring” аймшгийн кинонд тоглосноор олон улсад танигдаж, эл киноны дүрээрээ 2003 онд “MTV Movie Award”-аас шагнал хүртэж байв.
Дэйви Чейз HBO-ийн “Big Love” (2006–2011) драмын цувралд туслах дүр бүтээснээр хүүхдийн дүрээс насанд хүрсэн бүсгүйн дүрүүдэд шилжиж, “Donnie Darko” киноны үргэлжлэл болох “S. Darko” (2009) кинонд Саманта Даркогийн дүрийг дахин бүтээж, 2016 онд “Jack Goes Home”, “American Romance” кинонуудад тоглосныхоо дараа жүжигчний карьераа дуусгасан юм.
