Монголын уламжлалт хүндэтгэлийн зоог болох хорхгийг дэлхийд сурталчлан таниулах зорилгоор мянган тогооч нэгэн зэрэг 1,000 тогооны хорхог хийж, “Guinness World Records” буюу Гиннесийн номд бүртгүүлэх арга хэмжээ Налайх дүүргийн Тайж хайрханд боллоо.
Тус арга хэмжээ нь наймдугаар сарын 21-23-ны өдрүүдэд зохион байгуулагдаж буй “Нүүдэлчин” дэлхийн соёлын фестивалийн хүрээнд болсон юм.
Монголын тогооч нарын холбооноос хорхгийг дэлхийн “Guinness World Records”-т бүртгүүлэх санаачилгыг анх гаргаснаас хойш 10 орчим жил болж байгаа бөгөөд энэ жил уг санаачилгыг бодитоор хэрэгжүүлэхээр ажиллажээ.
Арга хэмжээний үеэр 1,000 тогооч нэгэн зэрэг хорхог бэлтгэж, “Хамгийн олон хүн нэгэн зэрэг хорхог бэлтгэсэн” ангиллаар дэлхийн дээд амжилт тогтоохоор оролцжээ. Зохион байгуулагчдын мэдээлснээр “Guinness World Records”-ийн олон улсын шүүгчид үйл ажиллагаанд ажиллаж, рекордын шаардлагыг шалгасан байна.
Хорхог нь хонь, ямааны махыг галд улайсгасан чулууны тусламжтайгаар битүү жигнэж болгодог Монголын уламжлалт хоол юм. Монголчуудын хувьд хорхог нь зөвхөн өдөр тутмын хоол хүнс бус, зочин гийчин хүндэтгэн дайлдаг үндэсний зоогийн нэг хэлбэрээр уламжлагдан иржээ.
Энэхүү арга хэмжээгээр дамжуулан Монголын үндэсний хоол, нүүдэлчин ахуй, уламжлалт хоол хүнсний соёлыг олон улсад сурталчлах, аялал жуулчлалын бүтээгдэхүүн болгон хөгжүүлэхийг зорьж буй аж.
