Жүжигчин Сильвестер Сталлоне АНУ-ын Ерөнхийлөгч Дональд Трампын санал болгосон “Холливудын тусгай элч”-ийн үүргийг хүлээн авах боломжгүй гэж үзсэнээ “The Sunday Times”-т өгсөн ярилцлагадаа дурдсан байна. Түүний хэлснээр, Трамп 2025 оны нэгдүгээр сард өөрийг нь Мел Гибсон, Жон Войт нарын хамт “Холливудын тусгай элч”-ээр томилсноо зарлах үед тэрбээр уг шийдвэрийг телевизээр мэдсэн аж.
“Би нэг орой телевиз үзэж байтал ‘Сталлоне, Мел Гибсон, Жон Войт нар …’ гэж ярьж байсан. Би ‘Юу, үнэхээр үү’ гэж бодсон. Хэрэв надаас асуусан бол би ‘Энэ боломжгүй’ гэж хэлэх байсан” хэмээн Сталлоне ярьжээ.
Тэрбээр уг үүргийг хүлээж авахаас татгалзсан шалтгаанаа Холливудын кино үйлдвэрлэлийн бүтэцтэй холбон тайлбарласан байна. Сталлонегийн хэлснээр, Холливуд нь олон тусдаа студи, компанийн ашиг сонирхол бүхий салбар тул нэг хүн гаднаас нь бүхэлд нь удирдах, өөрчлөхөд хүндрэлтэй аж.
Гэсэн хэдий ч Трамп 2025 оны нэгдүгээр сард Сталлоне, Гибсон, Войт нарыг “Холливудын тусгай элч”-ээр нэрлэсэн. Трампын мэдэгдэлд тэднийг гадаад улс орнууд руу шилжсэн кино үйлдвэрлэл, бизнесийг АНУ-д эргүүлэн татахад туслах төлөөлөгчид гэж тодорхойлж байв.
Сталлоне уг үүргээс татгалзсан ч Трампын талаар эерэгээр ярьсан хэвээр байна.
