Реппер Jay-Z өөрийн амьдрал, уран бүтээлийн замналын тухай өгүүлсэн HBO-ийн найман ангит “JAŸ-Z in 8” баримтат цувралаа үзэгчдэд хүргэж эхлээд буй. Цувралын эхний хоёр ангид The Notorious B.I.G. (Biggie), Tupac Shakur нарын зөрчил, өөрийн дотогшоо зан чанар болон аавтайгаа харилцах харилцааныхаа талаар илэн далангүй ярьжээ. Цувралын эхний хоёр анги есдүгээр сарын 18-нд “HBO Max”-аар гарсан байна.
Jay-Z уг баримтат цувралд хөгжмийн продюсер Рик Рубинтай ярилцсан бөгөөд яриа нь түүний олон жилийн уран бүтээлийн замнал, дуу хөгжмийн түүх дээр тулгуурлан өрнөсөн юм.
Баримтат цувралын хоёрдугаар ангид Jay-Z талийгаач реппер The Notorious B.I.G.-тэй хэрхэн дотноссон тухайгаа ярьжээ. Тэд “Brooklyn’s Finest” дууг хамтран бичиж, бичлэгийн үеэр ойртож эхэлсэн байна. Jay-Z-ийн хэлснээр тэр үеэс Biggie-тэй бараг өдөр бүр ярилцдаг болж, 1997 онд Biggie нас барах хүртэл тэдний нөхөрлөл үргэлжилжээ. Тэр хоёр баасан эсвэл бямба гараг бүр хамт хооллодог байсан аж.
Тэрбээр үргэлжлүүлэн 1990-ээд оны Зүүн эрэг–Баруун эргийн хип хопын зөрчил, Biggie болон Tupac-ын харилцааны талаар өөрийн ойлголтоо хуваалцсан байна. Түүний тайлбарласнаар, Biggie, Tupac хоёр анх маш дотно найзууд байсан ч эргэн тойронд нь байсан хүмүүс болон үүссэн үл ойлголцлын улмаас харилцаа нь муудсан. Улмаар хоёр уран бүтээлчийн хоорондын маргаан өргөжиж, бүхэл бүтэн Зүүн эрэг болон Баруун эргийн хип хопын сөргөлдөөн болсон. Jay-Z тухайн үеийн нөхцөл байдлыг “маш аюултай” байсан гэж дурсжээ.
