Өдгөө 61 настай Италийн жүжигчин Моника Беллуччи нас ахих үйл явц, гоо үзэсгэлэн, эмэгтэйчүүдийн нийгэм дэх байр суурь болон амьдралын талаарх үзэл бодлоо “Harper’s Bazaar España” сэтгүүлд өгсөн ярилцлагадаа хуваалцжээ.
Тэрбээр цаг хугацааг зогсоохыг хичээхийн оронд нас ахихыг амьдралын жам ёсны нэг хэсэг хэмээн хүлээн зөвшөөрч сурсан тухайгаа ярьсан байна.
Беллуччи сүүлийн үеийн уран бүтээлүүдийнхээ нэг болох “Histoires de la nuit” кинонд Кристина хэмээх зураачийн дүрийг бүтээжээ. Тус дүрд “эмэгтэйчүүд тодорхой насанд хүрээд үл үзэгдэгч болдог” гэх санаа гардаг ч жүжигчин өөрөө энэ үзэлтэй санал нийлдэггүй аж. Тэрбээр “Энэ бол нийгэмд түгээмэл байдаг айдсыг илэрхийлсэн үг. Гэхдээ би хувьдаа үүнтэй санал нийлэхгүй” гэсэн байна. Мөн түүний хэлснээр нас ахих нь жүжигчний хувьд зөвхөн хязгаарлалт биш, харин илүү гүн гүнзгий дүр бүтээх боломжийг олгодог байна.
Сэтгэл хөдлөлийн задралыг шаардсан дүрд үнэн бодит байдал, биеийн мэдрэмжийг гаргахын тулд хүн амьдрал үзсэн байх хэрэгтэй. Шарх, туршлага хуримтлуулсан байх шаардлагатай” хэмээн Беллуччи тайлбарлажээ. Тиймээс Беллуччи залуу байхдаа бүтээсэн “Malèna”, “Irreversible”, “The Passion of the Christ” зэрэг киноныхоо дүрүүд шиг дүрийг өнөөдөр дахин бүтээхийг хүсэхгүй гэдгээ хэлжээ.
Тэрбээр мөн нас ахисан ч уран бүтээлээ үргэлжлүүлж буй Катрин Денёв, Изабель Юппер, Фанни Ардан нарыг онцолж, кино урлагийн салбарын нас ахисан эмэгтэй жүжигчдэд хандах хандлага аажмаар өөрчлөгдөж байгааг дурдсан байна.
