Реппер 50 Cent 19 жилийн өмнө Нью-Йоркийн Куинс дүүргийн орхигдож, арчилгаагүй болсон газрыг сэргээн тохижуулж байжээ. Түүний санаачилгаар шинэчлэгдсэн “Curtis “50 Cent” Jackson Community Garden” цэцэрлэгт хүрээлэн өдгөө ч нутгийн иргэдийг нэгтгэсэн ногоон байгууламж хэвээр байна. Тэрбээр л санаачилгаа жүжигчин, дуучин Бетт Мидлертэй хамтран хэрэгжүүлсэн байна.
50 Cent буюу Кертис Жеймс Жексон III саяхан “The Tonight Show Starring Jimmy Fallon” нэвтрүүлэгт оролцохдоо уг төсөл хэрхэн эхэлсэн талаар дурсжээ. Тэрбээр Бетт Мидлерийн үүсгэн байгуулсан “New York Restoration Project” (NYRP) байгууллагын арга хэмжээнд оролцож, Нью-Йорк хотод тарих зориулалттай нэг бүр нь 2500 ам.долларын үнэтэй 10 интоорын мод худалдан авсан байна. Улмаар NYRP-ийн хийж буй ажлаас санаа авсан 50 Cent өөрийн өссөн Куинс дүүрэгт ижил төстэй төсөл хэрэгжүүлэх хүсэлтэй байгаагаа илэрхийлжээ. Ингэснээр Мидлертэй хамтран Жамайка орчимд байрлах хуучин “Baisley Park Community Garden”-г бүрэн шинэчлэх ажил эхэлсэн байна.
50 Cent-ийн “G-Unity Foundation” төслийн санхүүжилтэд оролцож, ландшафтын архитектор Уолтер Худ шинэ загварыг нь гаргажээ. Сэргээн тохижуулсан цэцэрлэгийг 2008 оны арваннэгдүгээр сард албан ёсоор нээж, “Curtis “50 Cent” Jackson Community Garden” хэмээн нэрлэсэн байна.
Ойролцоогоор дөрөвний нэг акр талбай бүхий цэцэрлэгийг байгальд ээлтэй олон шийдэлтэйгээр тохижуулжээ. Тухайлбал, газар доорх саванд борооны ус хуримтлуулж ургамал услахад ашигладаг бөгөөд нарны эрчим хүчээр ажилладаг усны насос суурилуулсан байна. Мөн 30 гаруй мандалд тоор, алим, чавга, интоор, нектарин зэрэг жимсний мод ургадаг. Цэцэрлэгийг 2020 онд дахин шинэчилсэн бол 2026 онд ч тохижилтын ажлыг үргэлжлүүлж, шинэ явган зам зэрэг байгууламж нэмжээ.
