“Форрест Гамп” киноны дэслэгч Дэннийн дүрээрээ алдартай жүжигчин Гэри Синиз хорт хавдрын улмаас 33 насандаа нас барсан хүү Макынхаа тухай дурсаж, гэр бүлийнхээ туулсан хүнд хэцүү он жилүүд болон хүүгээсээ сурч мэдсэн амьдралын үнэ цэнтэй сургамжуудаа шинэ номдоо хуваалцжээ.
Тэрбээр “Graceful Warrior: The True Story of a Son, a Father, and a Family Who Carried Each Other Through” нэртэй дурсамж номоо арваннэгдүгээр сарын 10-нд хэвлүүлэх гэж байна. Энэ өдөр түүний хүү Мак 35 нас хүрэх байсан бөгөөд жүжигчин номоо хүүгийнхээ дурсгалд зориулжээ.
Синизийн гэр бүлийн хувьд 2018 он хүнд сорилтын эхлэл болсон юм. Тухайн онд түүний эхнэр Мойра Синиз хөхний хорт хавдартай гэж оношлогдсон бол удалгүй тухайн үед 27 настай байсан хүү Мак нь нурууны ховор төрлийн хорт хавдар болох хордома (chordoma) өвчтэй болох нь тогтоогджээ.
Мак олон удаагийн мэс засал, эмчилгээ, эмнэлэгт хэвтэх хугацаа болон хүчтэй өвдөлтийг даван туулсан ч өвчин нь даамжирч, бие даан амьдрах чадварт нь нөлөөлсөн байна. Гэсэн хэдий ч тэрбээр хөгжмийн бүтээлээ туурвисаар, гэр бүл болон ойр дотнынхондоо урам зориг өгч байжээ.
Мак 2024 оны нэгдүгээр сарын 5-нд 33 насандаа таалал төгссөн юм. Харин эхнэр Мойра нь эмчилгээний дараа хорт хавдраас ангижирсан байна.
Гэри Синиз шинэ номдоо хүүгийнхээ өвчинтэй тэмцсэн түүхийг төдийгүй гэр бүлийнхнийхээ итгэл найдвар, хайр, эв нэгдэл, сэтгэлийн тэнхээний тухай өгүүлжээ. Тэрбээр хүүгийнхээ өвчний хүнд үед жүжигчний ажлаа түр орхиж, гэр бүлдээ анхаарал халамж тавихыг нэн тэргүүнд тавьсан байна.
Жүжигчин “Graceful Warrior” номынхоо талаар ярилцахдаа энэ бүтээл зөвхөн хорт хавдрын тухай биш, харин амьдралын хүнд сорилтыг хэрхэн даван туулж, итгэл найдвараа алдахгүй байх тухай гэдгийг онцолжээ.
Тэрбээр мөн хүүгээсээ өдөр бүрийг үнэ цэнтэй өнгөрүүлэх, байгаа зүйлдээ талархах, бэрхшээлтэй тулгарсан ч бууж өгөхгүй байхыг сурсан гэдгээ ярьсан байна.
Синиз номынхоо гол санааг “Та оролдохоо болихоос нааш ялагдаагүй гэсэн үг” хэмээн илэрхийлжээ.
Тэрбээр энэхүү бүтээлээрээ хайртай хүнээ өвчин, хагацлын улмаас алдсан гэр бүлүүдэд итгэл найдвар, урам зориг өгөхийг хүсэж байгаа аж. Өөрийнх нь туулсан зовлонг бусадтай хуваалцах нь ижил сорилттой нүүр тулж буй хүмүүст ганцаараа биш гэдгээ мэдрэхэд тусална гэж үзэж байна.
