"Сайн уу амьдрал минь", "Намрын синдром", "Мөнгөний гахай" инээдмийн киногоор үзэгчидтэй уулзсан "ТВ Коктейль" хамтлагийнхан дөрөв дэх уран бүтээл болох "Омарын эрэлд" киногоо саяхан дэлгэсэн билээ.
Найруулагч Ж.Сэнгэдоржийн анхны инээдмийн кино ийнхүү монголын кино урлагийн инээдмийн төрөлд “тэсрэлт” хийсэн үзүүштэй бүтээл болсон юм. Энэхүү киноны продюсероор С.Жавхлан, жүжигчин Э.Цолмонбаяр нар ажилласан бөгөөд зураглаачаар “Логик” фильм студийн Э.Нэргүй, хөгжмийн зохиолчоор “Ертөнц” цомгийн зохиолч Г.Онон нар ажиллажээ.
Киноны гол дүрд “ТВ Коктейль” хамтлагийн залуус бүрэн бүрэлдэхүүнээрээ тоглосон бөгөөд Төрийн соёрхолт жүжигчин Ц.Төмөрбаатар, жүжигчин Б.Баатархүү, Б.Навчаа, Д.Дэлгэрсайхан, Х.Манлайбаатар, Р.Адъяа нар оролцон тогложээ.
Киноны хийц, зураг авалт, хөгжим, дуу, шуумаараа дэлхийн инээдмийн кинотой эн зэрэгцэхүйц болсон энэхүү бүтээлд үзэгчид ам сайтай байгаа юм.
Хөлсний ажил хийж амьжиргаагаа залгуулдаг дөрвөн эр санамсаргүй байдлаар дээрэмчдийн хууль бус аргаар олсон их хэмжээний мөнгийг гартаа оруулна. Тэднийг ийм их хэмжээний мөнгөтэй болсныг хэн ч мэдээгүй бөгөөд тэднийг хэн ч сэжиглэж мөрдөж мөшгихгүй байлаа. Гэвч тэд энэ мөнгийг үрж эхлэх л юм бол хүн бүхэн тэднийг сэжиглэх болно. Харин тэд их хэмжээний мөнгөө яах бол баригдахгүйгээр үрэх болов уу , эс чадах уу гэдгийг уншигч та өөрт ойр кино театрыг сонгон үзээрэй.
Дашрамд дуулгахад, "Омарын эрэлд" адал явдалт инээдмийн киноны тасалбарт эрэлттэй байгаа гэсэн шүү. Тиймээс үзэгч авхай та эртхэн тасалбараа захиалаарай.
