Энэ сарын 20-ны морин цагт Улаанбаатар Эрдэм Их Сургуулийн сэтгүүлзүйн тэнхимийн оюутнууд Монгол Улсын утга зохиол, сэтгүүлзүйн салбарын нэрт төлөөлөгчдийг хүндэтгэн залж хадаг барин шавь орох “ БАГШ ШАВИЙН БАРИЛДЛАГА“ ёслолын ажиллагааг зохион байгууллаа.
Уг арга хэмжээнд МУСГЗ, Дашдоржийн Нацагдоржийн болон Жамсраны Цэвээний шагналт зохиолч сэтгүүлч, док, проф Т. Баасансүрэн, МУ-ын соёлын гавьяат зүтгэлтэн, телевизийн оператор Б. Донров, МУ-ын соёлын гавьяат зүтгэлтэн, радиогийн сэтгүүлч Гүнсэн, МУ-ын соёлын гавьяат зүтгэлтэн, сэтгүүлч Д.Дорждулам тэргүүтэй хорь гаруй нэрт төлөөлөгчид хүрэлцэн ирж багш шавийн барилдлага тогтоолоо.
Энэ нь Монгол улсын хэмжээнд төдийгүй сэтгүүлч боловсон хүчин бэлтгэдэг их дээд сургуулиудад урьд өмнө болж байгаагүй цоо шинэ арга хэмжээ юм.
Уг ёслолын ажиллагааг ШУ-ны академийн дэд ерөнхийлөгч, академич Т.Дорж нээн үг хэлсэн бөгөөд тус сургуулийн авьяаслаг оюутнууд ая дуугаараа мэндчилж уригдсан олны сонорыг баясгалаа. Мөн УБЭИС-ийн тэнхимийн эрхлэгч МУСГЗ, доктор, проф Т.Баасансүрэн “МОНГОЛЫН ШИЛДЭГ НИЙТЛЭЛ “ 99 ботийн шинэ дугааруудыг улсын номын сангууд болон сэтгүүлч боловсон хүчин бэлтгэж байгаа их дээд сургуулиудын сэтгүүлзүйн тэнхимүүдэд бэлэглэхээс гадна ирсэн зочид гийчдэд УБЭИС-ийн сэтгүүлзүйн тэнхимийн багш, оюутнуудын бүтээлийн үзэсгэлэнг толилууллаа.
www.URLAG.mn