“Мухар гудамж” кино өнөөдөр буюу 11 сарын 28 нд "Өргөө 2" кино театрт 14 цаг 30 минутаас, "Тэнгис" кино театрт 17 цагаас нээлтээ хийх гэж байна. Киноны нээлтэнд бүх уран бүтээлчид оролцох бөгөөд "Guys 666" хамтлагийнхан ая дуугаа өргөж, азтай таван үзэгчийг шалгаруулах юм байна.
Энэ кино нь Монголын өнөөгийн нийгмийн амьдралын үнэн бодит өнгийг тод харуулж байгаагаараа онцлог. Хүн хүний харилцаа, эрх мэдэлтэнгүүдийн бодлого, шийдвэр, өнгө мөнгөний олон хүчин зүйлсээс үүдэж нийгмийн салбар бүрт саад бэрхшээл, асуудал тулгарч эцэст нь мухардалд ордгийг харуулна. Киноны гол дүрд, жүжигчин Д.Лхагва, Ц.Цэрэнболд, МУАЖ П.Цэрэндагва, МУГЖ Ж.Равдан, Ж.Дарамсүрэн нарын тайз, дэлгэцийн шилдгүүд тогложээ.
Харин киноны ганц эмэгтэй жүжигчин болох дуучин, жүжигчин Дулма Сунрапова ОХУ-ын Буриад улсаас уригдан тоглож байгаа юм. “Сити” дээд сургуулийг 2008 онд жүжигчин мэргэжлээр төгссөн Дулма нь суралцах хугацаандаа Л.Балхжавын дууг хэн сайн дуулах вэ буюу “New stars” эстрад дууны тэмцээнд оролцож, тэргүүн байр эзэлж байжээ. Мөн Л.Балхжав хөгжмийн зохиолчийн “Миний дуунууд-2007, 2008” зэрэг тоглолтуудад оролцож байсан юм. “ Мухар гудамж” нь “LVA” энтертайнментын дэлгэцийн дөрөв дэх бүтээл юм.
"Мухар гудамж" уран сайхны киноны Продюсерээр Д.Лхагва, Ерөнхий найруулагчаар Д.Баярсайхан, Ерөнхий зураглаачаар О.Эрдэнэбат нар ажилласан байна. Үзэгчдийн хувьд, Монголын кино урлагт жин дарах бүтээлүүдийн нэг гэсэн хүлээлттэй байгаа “Мухар гудамж” уран сайхны кино ийнхүү нээлтээ хийж байна.
www.URLAG.mn
